Bo‘stonliq tumanidagi «noqonuniy chiqindixona» bartaraf etildi

Ijtimoiy tarmoqlarda Bo‘stonliq tumani «Yangi hayot» MFY hududida noqonuniy chiqindixona yuzaga kelgani aks etgan video tarqaldi.

Mazkur holat yuzasidan Chiqindilarni boshqarish va sirkulyar iqtisodiyotni rivojlantirish agentligi ishchi guruhi tomonidan joyiga tezkor chiqilib, vaziyat atroflicha o‘rganildi. 

O‘rganish jarayonida chiqindilar yuridik va jismoniy shaxslar tomonidan belgilanmagan joylarga tashlangani natijasida to‘planib qolgani aniqlangan. Hudud sanitar tozalash korxonalari xizmat ko‘rsatish joriy reja-grafik ishlariga kiritilmagan bo‘lsa-da, agentlik tomonidan zarur choralar ko‘rilgani qayd etilgan.

Shu bilan birga, agentlik huzuridagi kuzatuv kameralaridan foydalanish va nazorat qilish bo‘limi tomonidan hududga 24/7 rejimda ishlovchi zamonaviy kuzatuv kameralari o‘rnatilgan.

«Mazkur kameralar orqali belgilanmagan joylarga chiqindi tashlash bilan bog‘liq huquqbuzarliklarni aniqlash, ularning oldini olish hamda qonunchilikda belgilangan tartibda tegishli choralar ko‘rish imkoniyati yaratiladi.

Mazkur holatga befarq bo‘lmay, atrof-muhit tozaligi masalalariga e’tibor qaratgan jamoatchilik faollariga o‘z minnatdorchiligimizni bildiramiz», – deyiladi agentlik matbuot xizmati xabarida.

Fuqarolardan chiqindilarni belgilanmagan joylarga tashlamaslik so‘ralgan.

«Tozalikni saqlash – bu barchaning birgalikdagi sa’y-harakatlari hamda atrof-muhitga hurmat bilan munosabatda bo‘lish demak!» – deya qayd etiladi xabarda.