Navoiyda 8 yoshli o‘quvchi B2 sertifikatini qo‘lga kiritdi

Navoiy shahridagi 4-umumta’lim maktabining 2-sinf o‘quvchisi Muhammadali Yusupov ingliz tilidan B2 sertifikatni qo‘lga kiritdi. Bu yosh jihatdan milliy sertifikatni qo‘lga kiritish bo‘yicha O‘zbekistondagi eng yaxshi natijalardan biri bo‘ldi.

Ma’lum bo‘lishicha, Muhammadali qariyb 3 yildan buyon ingliz tilini qo‘shimcha darslar asosida o‘rganib kelgan. Unga oxirgi 6 oyda o‘quv markazi o‘qituvchisi Shahzod Bobonazarov dars o‘tgan.

“Birinchi urinishdayoq sertifikatni qo‘lga kiritdi. Bu O‘zbekistondagi eng yaxshi natijalardan biri”, deydi Shahzod Bobonazarov.

Muhammadali Yusupovning onasi Shohsanam Hasanova uy bekasi, otasi Alisher Ro‘ziyev esa NKMKda faoliyat olib boradi.

Avvalroq Farg‘onada 3-, Samarqandda 4- hamda Navoiyda 5-sinf o‘quvchisi shunday natijani qayd etgandi.

Tahririyat: Shu turdagi milliy sertifikatni qo‘lga kiritgan o‘quvchilarning yaqinlaridan bu haqida xabar chiqarishni so‘rab ko‘p so‘rov keladi. Kelgusida 8 va undan kichik yoshdagi shunday qahramonlar haqida ma’lumot yuborilishi maqsadga muvofiq bo‘lar edi.