Farzand tug‘ilganda otaga ham ta’til berilishi mumkin

O‘zbekistonda mehnat munosabatlarini takomillashtirishga qaratilgan qonun loyihasi 5 may kuni deputatlar tomonidan birinchi o‘qishda qabul qilindi.

“Milliy tiklanish” partiyasi xabariga ko‘ra, ushbu qonun loyihasida ishli erkaklar farzandli bo‘lganda xotiniga yordam berish va boshqa farzandlariga qarab turishi uchun qisqa muddatli ta’til berish belgilanmoqda. Uning miqdori xabarda keltirilmagan. Loyiha bilan amaldagi qonunchilikka bu bo‘yicha o‘zgartirish va qo‘shimchalar kiritilyapti.

Bundan tashqari, ta’kidlanganishicha, qonun loyihasi mehnat munosabatlarini rasmiylashtirishni soddalashtirish, ortiqcha byurokratik to‘siqlarni bartaraf etish hamda xodimlarning huquqlarini ishonchli himoya qilishga qaratilgan.

Xususan, ishga qabul qilishda talab etiladigan hujjatlar ro‘yxati qisqartirilmoqda. Taklif etilayotgan tartibga ko‘ra, fuqaroni ishga qabul qilishda asosan uning shaxsiy identifikatsiya raqami talab etiladi. Harbiy xizmatga majburlar va chaqiriluvchilar esa harbiy guvohnoma yoxud harbiy hisobda turganlik haqidagi guvohnoma taqdim etishi lozim.

Qonun loyihasida mehnat munosabatlarini raqamlashtirishga ham alohida e’tibor qaratilgan. Ishga kirishda elektron mehnat daftarchasidan ko‘chirma berish bekor qilinmoqda. Shuningdek, elektron raqamli imzo yoki biometrik identifikatsiya (Face-ID) orqali tasdiqlangan hujjatlar yuridik jihatdan qo‘lda imzolangan hujjatlar bilan tenglashtirilmoqda.

Qonun loyihasida mehnat jarayonida tazyiq va zo‘ravonlikka qarshi kurashishga doir normalar ham o‘z aksini topgan. Jumladan, bunday holatlarni taqiqlash, ularning oldini olish va jabrlangan xodimlarni himoya qilish choralari belgilanmoqda.

Bundan tashqari, ish beruvchi tomonidan ish haqi to‘lash muddati buzilgan taqdirda, har bir kechiktirilgan kun uchun pulli kompensatsiya to‘lash tartibi aniqlashtirilmoqda.

Muhokamalardan so‘ng, qonun loyihasi deputatlar tomonidan birinchi o‘qishda qabul qilindi.