O‘zbekiston RITM-200N reaktorli AES energiya blokini qurish uchun litsenziya berdi

Qo‘mita xabariga ko‘ra, qaror milliy qonunchilik, xalqaro amaliyot va Xalqaro atom energiyasi agentligi (XAEA) tavsiyalariga muvofiq loyiha hujjatlari, loyiha yechimlari va xavfsizlikni asoslash materiallarini ko‘rib chiqish yakunlari bo‘yicha qabul qilingan.

Ekspertizada xorijiy mutaxassislar va xalqaro tashkilotlar vakillari, jumladan, Rossiyaning Radiatsiya va yadro xavfsizligi ilmiy-texnik markazi ekspertlari ishtirok etgani ta’kidlanmoqda.

Avvalroq qo‘mita «Atom elektr stansiyasini qurish direksiyasi» davlat muassasasi tomonidan taqdim etilgan loyiha hujjatlarini o‘rganib chiqqan edi. Ekspertiza natijalariga ko‘ra, 23 mart kuni yadroviy qurilmalarni joylashtirish uchun mo‘ljallangan maydondan foydalanishga ruxsat berildi.

AES loyihasini amalga oshirishning barcha bosqichlarida yadroviy va radiatsiyaviy xavfsizlikni ta’minlash ustidan nazorat Sanoat, radiatsiya va yadro xavfsizligi qo‘mitasiga yuklatilgan. Idora litsenziya shartlariga, qurilishda xavfsizlik talablariga rioya etilishi, shuningdek, aholi va atrof-muhit xavfsizligi ta’minlanishi ustidan doimiy davlat nazoratini amalga oshirishi kerak.

O‘zbekistonda jahon amaliyotida ilk marta bir maydonda umumiy o‘rnatilgan quvvati qariyb 2,1 ming MVt bo‘lgan ikkita katta quvvatli VVER-1000 va ikkita kichik quvvatli RITM-200N energobloklarini joylashtirish rejalashtirilmoqda. Kombinatsiyalangan konfiguratsiya yiliga 15 milliard kVt·soatgacha elektr energiyasi ishlab chiqarish imkonini berishi kutilmoqda. Loyihaning bosh pudratchisi «Atomstroyeksport» AJ (Rossiya) hisoblanadi.

Rossiyaning «Rosatom» davlat korporatsiyasi va O‘zbekiston Vazirlar Mahkamasi huzuridagi Atom energiyasi agentligi («O‘zatom») mart oyi oxirida Toshkentda atom va unga bog‘liq sohalarda hamkorlik bo‘yicha «yo‘l xaritasi»ni, shuningdek, atom elektr stansiyasini qurish bo‘yicha shartnomaga qo‘shimcha kelishuvni imzolagan edi.