Visual Capitalist Jahon sayohat va turizm kengashi - WTTC maʼlumotlari asosida 2025-yildagi eng yirik 25 ta turizm iqtisodiyotini taqqoslagan.
Baholashda mehmonxonalar, restoranlar va transport kompaniyalari faoliyatidan tashqari, ularga tovar va xizmat yetkazib beruvchilar hamda soha xodimlarining xarajatlari orqali yuzaga keladigan iqtisodiy taʼsir ham hisobga olingan. Shuning uchun bu roʻyxat eng koʻp xorijiy sayyoh qabul qilgan davlatlar reytingi bilan bir xil emas.
Birinchi uchlik quyidagicha:
AQSH - 2,63 trillion dollar;
Xitoy - 1,75 trillion dollar;
Germaniya - 566 milliard dollar.
AQShning koʻrsatkichi Xitoynikidan qariyb 50 foiz yuqori. Ikki davlat oʻrtasidagi farq 880 milliard dollarga yetgan. Bu qolgan har qanday alohida mamlakatda turizmning iqtisodiyotga qoʻshgan hissasidan ham katta.
Germaniya Yevropa yetakchisiga aylanib, Fransiya va Ispaniya kabi mashhur sayyohlik yoʻnalishlarini ortda qoldirgan. Bunda mamlakat ichki bozorining kattaligi muhim ahamiyat kasb etgan.
2025-yilda Germaniyada qayd etilgan tunab qolishlarning qariyb 83 foizi mamlakat aholisi hissasiga toʻgʻri kelgan. Xorijiy mehmonlarning tunab qolishlari kamayganiga qaramay, ichki talab hisobiga joylashtirish muassasalarida yillik rekord natija kuzatilgan.
Yaponiya esa 2025-yilda rekord darajada - 42,7 million xorijiy sayyohni qabul qilgan. Bu 2024-yildagidan 15,8 foiz koʻp. Sakura gullashi va qishki sport turlari kabi mavsumiy yoʻnalishlar bilan birga, Osakada oʻtkazilgan Expo jahon koʻrgazmasi ham safarlarga qoʻshimcha turtki bergan.
Xitoyning turizm iqtisodiyoti 2025-yilda 9,9 foizga oʻsgan. Bu oʻrtacha jahon oʻsish surʼatidan ikki baravardan ham yuqori. Xorijiy sayyohlar soni 15,5 foizga koʻpayib, 68 milliondan oshgan, ularning xarajatlari esa pandemiyadan oldingi darajadan yuqorilagan.
Mamlakatga kirish tartiblarining yengillashtirilishi ham sayyohlarni jalb qilishga yordam bermoqda. Xitoy vizasiz kirish mumkin boʻlgan davlatlar roʻyxatini kengaytirib, tranzit yoʻlovchilar uchun ruxsat etilgan qolish muddatlarini uzaytirgan. Chegaradan oʻtish jarayonlari va raqamli toʻlov xizmatlarining qulaylashishi ham sayohatlarni osonlashtirmoqda.
