O‘zbekistonda atom energetikasi bo‘yicha mintaqaviy markaz tashkil etiladi

O‘zbekistonda atom energetikasi sohasida bilim va malakalar mintaqaviy markazi tashkil etiladi. Markaz Markaziy Osiyo davlatlari uchun mutaxassislar tayyorlash, xalqaro o‘quv dasturlarini yo‘lga qo‘yish va yadroviy xavfsizlik sohasida hamkorlikni rivojlantirishga xizmat qiladi.

Vazirlar Mahkamasining qaroriga ko‘ra, Atom energetikasi sohasida bilim va malakalar mintaqaviy markazi Toshkent shahridagi «MMFI» Milliy tadqiqot yadro universiteti filiali tarkibida alohida tarkibiy bo‘linma sifatida tashkil etiladi.

Hujjatga muvofiq, markaz Markaziy Osiyo davlatlari mutaxassislari uchun atom energetikasi obektlarini loyihalashtirish, qurish va xavfsiz ekspluatatsiya qilish bo‘yicha xalqaro standartlarga mos o‘quv modullari hamda amaliy treninglar tashkil etadi. Shuningdek, zamonaviy o‘quv laboratoriyalari va atom elektr stansiyasi simulyatorlari bazasida o‘quv mashg‘ulotlari o‘tkaziladi.

Markazning asosiy vazifalari qatoriga milliy yadroviy infratuzilmani rivojlantirish bo‘yicha ekspert-konsalting xizmatlari ko‘rsatish, atom energetikasi sohasida mintaqaviy kadrlar zaxirasini shakllantirish, talabalar va yosh olimlarning akademik almashinuvini qo‘llab-quvvatlash hamda O‘zbekistonning atom energetikasi tajribasini mintaqa davlatlariga tarqatish kiradi.

Qarorga muvofiq, bir oy muddatda markaz to‘g‘risidagi nizom va tashkiliy tuzilma tasdiqlanadi, uch oy ichida esa uni malakali kadrlar bilan to‘ldirish choralari ko‘riladi.