“Moody’s” xalqaro reyting agentligi “O‘zsanoatqurilishbank” kredit reytingini oshirdi

Mazkur reyting mamlakatimizda bank-moliya tizimida amalga oshirilayotgan islohotlar samaradorligi, sohaga davlat tomonidan qaratilayotgan e’tibor, bankda olib borilayotgan transformatsiya jarayonlari, strategik loyihalarni moliyalashtirishdagi faol ishtiroki hamda xalqaro kapital bozorlaridagi muvaffaqiyatli operatsiyalari yuksak baholanayotganining yana bir amaliy tasdig‘i bo‘ldi.

Shuningdek, agentlik tahlilchilari bankning mamlakat bank tizimidagi barqaror o‘rni, qarz qimmatli qog‘ozlari bozoridagi faoliyati hamda ESG yo‘nalishida amalga oshirayotgan tashabbuslarini alohida e’tirof etdi.

2025 yil yakunlari bo‘yicha moliyaviy hisobotning xalqaro standartlariga ko‘ra, bank quyidagi natijalarga erishdi:

 • sof foyda 128,4 mln AQSh dollarini tashkil etib, 38 foizga o‘sdi;

 • jami aktivlar 8,1 mlrd AQSh dollariga yetib, 15 foizga ko‘paydi;

 • kapital rentabelligi (ROE) 15,7 foizni tashkil etib, 3,2 foiz bandga oshdi;

 • yashil kredit portfeli 654,3 mln AQSh dollariga yetib, 17 foizga o‘sdi.

Bundan tashqari, bank aksiyalarining 40 foizi “Franklin Templeton” xalqaro investitsiya kompaniyasining ishonchli boshqaruvidagi O‘zbekiston Respublikasi Milliy investitsiya jamg‘armasiga o‘tkazilgani hamda joriy yil may oyida Jamg‘arma aksiyalarining London fond birjasidagi birlamchi ommaviy joylashtirilishi (IPO) muvaffaqiyatli amalga oshirilgani “Moody’s” ekspertlari tomonidan ijobiy baholandi.

Bank reytingining oshirilishi xalqaro investorlar ishonchi yanada mustahkamlanganidan dalolat beradi. Bu esa xalqaro kapital bozorlarida bank mavqeyini kuchaytirish, tashqi moliyaviy resurslarni yanada qulay shartlarda jalb etish hamda mahalliy tadbirkorlik sub’yektlarini moliyalashtirish imkoniyatlarini kengaytirishga xizmat qiladi.

“O‘zsanoatqurilishbank” ATB

 Tashqi aloqalarni

muvofiqlashtirish xizmati

Reklama huquqi asosida