Qaysi holatlarda xavfsizlik kamarini taqmaslikka ruxsat beriladi?

O‘zbekiston qonunchiligiga ko‘ra, konstruksiyasida xavfsizlik kamarlari nazarda tutilgan transport vositalarini boshqarayotgan haydovchilar va old o‘rindiqdagi yo‘lovchilar harakatni boshlashdan avval xavfsizlik kamarini taqishi shart. Shu bilan birga, ayrim toifadagi shaxslar uchun mazkur talabdan istisnolar belgilangan.

Foto: Getty Images

Qonunchilikka muvofiq, xavfsizlik kamarini taqmaslikka quyidagi holatlarda ruxsat beriladi:

avtomobilning orqa o‘rindig‘ida o‘tirgan 12 yoshgacha bo‘lgan bolalarga;
o‘quv-mashq transport vositasini o‘quvchi boshqarayotgan vaqtda avtomototransport yoki shahar elektr transportini boshqarishni o‘rgatuvchi amaliy mashg‘ulotlar instruktoriga;
homilador ayollarga hamda sog‘lig‘i tufayli xavfsizlik kamarini taqishi mumkin bo‘lmagan bemorlarga;
xizmat vazifasini bajarayotgan, ko‘k yoki qizil (yoki ikkalasi birgalikdagi) yaltiroq mayoqcha bilan jihozlangan hamda maxsus rangli bo‘yoq sxemasi va yozuvlarga ega transport vositalari haydovchilari va yo‘lovchilariga.

Qolgan barcha holatlarda haydovchi va old o‘rindiqdagi yo‘lovchilar uchun xavfsizlik kamarini taqish majburiy hisoblanadi. Bu talab yo‘l-transport hodisalari oqibatida jarohatlanish va halok bo‘lish xavfini kamaytirishga qaratilgan.