Zaporijjya viloyati harbiy ma’muriyati rahbari Ivan Fedorovning Telegram orqali xabar berishicha, qurbonlardan biri - 67 yoshli erkak Zaporijjya shahrida boshqariluvchi aviatsiya bombasi xususiy uyga kelib tushishi oqibatida halok bo‘lgan.
Fedorov ma’lumotlariga ko‘ra, Rossiya qo‘shinlari bir sutka davomida Zaporijjya viloyatining 45 ta aholi punktiga jami 917 marta zarba bergan.
Ularning 22 tasi aviatsiya zarbasi, 634 tasi uchuvchisiz uchish apparatlari orqali amalga oshirilgan hujumlar va 261 tasi artilleriya zarbalaridan iborat bo‘lgan.
Viloyat rahbarining bildirishicha, hujumlar oqibatida infratuzilma ob’yektlari, turar joylar va avtomobillarga zarar yetgani haqida 124 ta xabar kelib tushgan.
Xabar e’lon qilingan vaqtda Ukraina Harbiy-havo kuchlari Zaporijjya viloyatiga boshqariluvchi aviatsiya bombalaridan foydalangan holda yangi hujum uyushtirilishi xavfi borligidan ogohlantirgan. Shuningdek, reaktiv dron Zaporijjya shahri tomon harakatlanayotgani ma’lum qilingan.
Rossiya tomoni Kirillovkada 12 kishi halok bo‘lganini bildirgan
Bundan avval, 25 iyul kuni Rossiya tomonidan Zaporijjya viloyatining bosib olingan qismi rahbari etib tayinlangan Yevgeniy Balitskiy Ukraina tomoni Kirillovkadagi turistik bazalarga hujum qilganini bildirgan.
Uning ma’lumotlariga ko‘ra, tungi hujum oqibatida 12 kishi halok bo‘lgan va 19 kishi yaralangan. Balitskiy qurbonlarning to‘rt nafari, jarohatlanganlarning esa olti nafari bolalar ekanini aytgan.
25 iyul kuni Zaporijjyada savdo markazi yongan
O‘sha kuni Ukraina rasmiylari Rossiya qo‘shinlarining Kiyev nazoratidagi Zaporijjya viloyati hududlariga zarbalari haqida ham xabar bergan.
Ma’lumotlarga ko‘ra, 25 iyulga o‘tar kechasi hujumlar oqibatida o‘n kishi jabrlangan.
Ukraina Favqulodda vaziyatlar davlat xizmati Zaporijjya shahrida ikki qavatli savdo markazi, do‘kon va savdo pavilonlarida yong‘in chiqqanini bildirgan. Yong‘in qamrab olgan umumiy maydon 900 kvadrat metrni tashkil etgan.
25 iyul tongida Ivan Fedorov Zaporijjyaga yana zarbalar berilganini ma’lum qilgan. Uning so‘zlariga ko‘ra, hujumlar oqibatida bir ayol halok bo‘lgan, yana 11 kishi tibbiy yordamga muhtoj bo‘lgan. Jabrlanganlar orasida 3, 5 va 7 yoshli uch nafar bola ham bo‘lgan.
