«Dunyo» axborot agentligi xabariga ko‘ra, O‘zbekistonning Vladivostokdagi Bosh konsulxonasi qiyin vaziyatga tushib qolgan vatandoshlarga amaliy yordam ko‘rsatgan.
Xususan, Vladivostokda og‘ir moddiy ahvolga tushib qolgan A.L., uning turmush o‘rtog‘i K.B. va ularning uch nafar voyaga yetmagan farzandini O‘zbekistonga qaytarish choralari ko‘rilgan.
Oila uchun O‘zbekiston Migratsiya agentligi jamg‘armasi mablag‘lari hisobidan aviachiptalar xarid qilingan.
Natijada besh nafardan iborat oila 25 iyul kuni Vladivostok–Yekaterinburg–Toshkent yo‘nalishidagi reys orqali O‘zbekistonga qaytarilgan.
Bosh konsulxona vatandoshlarning huquq va manfaatlarini himoya qilish, ularga konsullik-huquqiy xizmatlar ko‘rsatish hamda migratsiya jarayonida yuzaga keladigan muammolarni hal etish bo‘yicha ishlar davom ettirilayotganini ma’lum qildi.
