1-avgust kuni O‘zbekiston Mudofaa vazirligining Farg‘ona garnizonidagi harbiy qism hududida o‘q otish sporti majmuasi hamda sport zali ochildi. Bu haqda vazirlik Axborot va ommaviy kommunikatsiyalar departamenti Kun.uz'ga ma’lum qildi.
Tadbirda O‘zbekiston mudofaa vaziri general-leytenant Shuhrat Xolmuhamedov, Farg‘ona viloyati hokimi Xayrulla Bozorov hamda jamoatchilik vakillari qatnashdi.
Ma’lum qilinishicha, harbiy-ma’muriy sektor mablag‘lari hisobidan barpo etilgan majmua qurilishi 2025-yil sentyabr oyida boshlangan bo‘lib, 2026-yil iyul oyida yakunlangan.
Majmua tarkibidan nazariy o‘quv sinfi, o‘quv va yo‘riqchilar xonalari hamda 20 ta o‘q otish yo‘nalishiga ega zamonaviy tir o‘rin olgan. Inshoot bir vaqtning o‘zida 20 nafargacha sportchi va mashg‘ulot ishtirokchilarini qabul qilish imkoniyatiga ega.
Tadbirda mehmonlarga amaliy o‘q otish mashg‘ulotlari, fotoelektron trenajyorlarda o‘quv jarayonlari va ko‘rgazmali chiqishlar namoyish etildi. Shuningdek, viloyatda o‘q otish sportini rivojlantirish borasida amalga oshirilayotgan ishlar va erishilgan natijalar haqida ma’lumot berildi.
«Bugungi kunda Farg‘ona viloyatida 184 nafar yosh o‘q otish sporti bilan muntazam shug‘ullanmoqda. Yangi majmuaning foydalanishga topshirilishi ushbu sport turini yanada ommalashtirish, iqtidorli yoshlarni qo‘llab-quvvatlash hamda harbiy-amaliy sportni rivojlantirishga xizmat qiladi», deyiladi vazirlik xabarida.
