Andijonning Eski shahar qismida kanalizatsiya uchun chuqur qazish fevralda boshlangan, lekin ish nihoyasiga yetkazilmay, chala qoldirib ketilgan. Chuqurga shu paytgacha bir necha kishi yiqilib, og‘ir jarohat olishdi. Ulardan biri yosh bola, ikkinchisi esa keksa yoshli erkak. Ular o‘z yonidan xarajat qilib davolanishga majbur bo‘lgan. Vaholanki, xavfsizlik qoidalari buzilgani yaqqol ko‘rinib turibdi. Ishlar to‘xtab qolgani hokimlik pul ajratmayotgani bilan bog‘lanyapti. Avvalroq “Andijon polka”ni rekordlar qatoriga kiritish 730 mln so‘mga tushgan edi.
Gap – Andijon shahridagi Zahiridin Muhammad Bobur mahallasi hududi haqida ketyapti.
“Hududda yashovchi yosh bolalardan biri reanimatsiyada ham yotib chiqdi. Yaqinda 70 yoshli qo‘shnimiz ham shu chuqurlikka yiqildi.
Qazilgan joyga odamlar chiqindi tashlab ketishyapti. Atrofni qo‘lansa hid tutib ketgan.
Mahallada Zahiriddin Muhammad Bobur muzeyi bor, sayyohlar keladigan joy.
Ko‘chadan ikkita mashina o‘tgudek bo‘lsa, tirbandlik bo‘lib ketyapti, bitta mashina zo‘rg‘a o‘tadi. Hademay qish keladi. Qirovli kunlarda bu ketishda hali holat bundan-da ayanchli bo‘ladi.
Yo‘l bo‘yida savdo qiladigan tadbirkorlar do‘konga o‘tish uchun ko‘priklar qurib olishgan. Ko‘prikdan o‘tish esa juda xavfli. Chuqurni deb ko‘plab savdogarlarning savdosi pasayib ketdi”, deydi Kun.uz'ga murojaat yo‘llagan aholi vakillaridan biri.
“O‘g‘lim chuqurga yiqilgan, qarzimizdan haliyam qutula olmadik”
“O‘g‘lim shu chuqurlikka yiqildi. Bosh miyasidan jarohat olib, shifoxonalarda yotib chiqdi. Qarz havola qilib, amallab dori-darmon topib berdik. Sharoitim og‘irligidan haliyam o‘sha qarzlardan qutulolganimiz yo‘q. Katta farzandim ham betob, uning dorilaridan orttirib qo‘shimcha shifokorlarga ko‘rsatish uchun kichik farzandimga imkoniyat qila olmadim.
Bolamda yiqilish asorati qolgan, shifokorlarga ko‘rsating deyishdi. Lekin imkoniyatim yo‘q. Shifoxonada yotgan kunlarimdagi qarzlarim hali ham uzilgani yo‘q. Farzandim shu ahvolga tushdi, boshqalarning bolasi azoblanishini xohlamayman. Iltimos, chuqurni tezroq yopib berishsin.
Mahalla raisiga kirib o‘g‘lim chuqurlikka yiqilib og‘ir ahvolga tushib qoldi desak, u bolam chuqurlikka emas, uyimizda yiqilib tushganini aytib, ishni yopishga harakat qilyapti”, – deydi chuqur tufayli o‘g‘li aziyat chekkan ona Dilrabo Nazirova.
Yoqilg‘isiz qolgan ekskavatorchi...
O‘sha hududda istiqomat qiluvchi aholi vakiliga ko‘ra, ishchilarga oylik maosh berilmagani sabab qurilish ishlari o‘z yakuniga yetmay, chala qolib ketgan.
“Uyimiz yoniga ekskavatorini qo‘yib ketgan haydovchi bilan gaplashib qoldim. U qurilish ishlariga jalb qilingan ekan. Haydovchi oylik tugul texnikasini boshqarish uchun yoqilg‘isiga ham pul berilmayotganidan shikoyat qildi. Mablag‘ yo‘qligidan boshqa ishchilar ham ketib qolgan”, deydi u.
“Hokim o‘rinbosaridan so‘rang”
Hududda qurilish ishlarini olib borayotgan “Yuksalish-Umid” MChJ qurilish ishlari nazoratchisi bilan telefon orqali suhbatlashdik.
U mahalladagi infratuzilma ancha eskirgani, qazilgan yo‘nalishda barcha kommunikatsiya vositalari (kanalizatsiya, suv, elektr) bir joyda o‘tishi uchun kerakli ishlar qilayotganini aytdi.
Qurilishning to‘xtab qolishi sababini esa Andijon shahar hokimi o‘rinbosari Ulug‘bek To‘raqulovdan so‘rash maqsadga muvofiqligini ta’kidladi. Nazoratchi hududda tez fursat ichida yana ishlar boshlanishidan umir bildirdi.
Andijon shahar hokimi o‘rinbosari Ulug‘bek To‘raqulov bilan bog‘lanishning iloji bo‘lmadi. Avval yig‘ilishda deya aytilgan hokim o‘rinbosari keyin qo‘ng‘iroqlarimizga javob bermadi.
Ma’lumot o‘rnida, Andijon viloyati byudjyetining 2026-yil zaxira jamg‘armasi hisobidan Madaniyat boshqarmasiga “Andijon polka” raqsini “Ginnes rekordlari” kitobiga kiritish bilan bog‘liq xarajatlarga 730 mln so‘m miqdorida mablag‘ ajratilgan.
