Yevropaga yaqinlashayotgan Kanada va siyosiy mahbuslarni ozod qilayotgan Lukashenko – kun dayjesti

Xuddi shuningdek, Trampning oldindan aytib boʻlmaydigan savdo va tashqi siyosatidan aziyat chekayotgan Kanada ham Yevropa Ittifoqi bilan yangi kelishuvlarga qiziqish bildirmoqda.

Avgust oyida AQSH-Kanada oʻrtasidagi savdo muzokaralari barbod boʻlgach, ikki davlat bir-biriga milliardlab dollarlik bojlar kiritgan va munosabatlari qariyb savdo urushi holatiga kelib qolgan.

Gʻazoda urushdan zararlangan bino quladi

16-sentabrga oʻtar kechasi tunda Gʻazo shahrida urushdan zarar koʻrgan 7 qavatli turar joy binosi qulab tushdi. Oqibatda kamida 21 nafar falastinlik, jumladan, ayollar va bolalar halok boʻldi. Mahalliy rasmiylarga koʻra, halok boʻlganlar orasida 6 nafar bola ham boʻlgan, yana 14 kishi jarohatlangan.

Gʻazo fuqaro mudofaasi matbuot kotibi Mahmud Basal qutqaruvchilar hamon vayronalar ostidan jasadlarni olib chiqish va bedarak yoʻqolganlarni qidirish ustida ishlayotganini bildirdi. «Hozirga qadar ushbu bino vayronalari ostida 100 ga yaqin falastinlik qolmoqda», deydi u. Qutqaruv guruhlarida tegishli uskunalar yoʻqligi sababli odamlarga yetib borish oʻta qiyin kechmoqda.

Mahalliy OAVning xabar berishicha, bino avvalroq Isroil hujumlaridan zarar koʻrgandi. Buning oqibatida u qulashidan oldin darz ketgan va konstruksiyasi zaiflashib qolgandi.

Gʻazodagi hukumat ushbu hodisa uchun «Isroil okkupatsiyasi va xalqaro hamjamiyatni toʻliq va bevosita javobgar» deb hisoblashini maʼlum qildi.

Hozirda Gʻazo boʻylab oʻn minglab aholi Isroil hujumlaridan zararlangan 2000 ga yaqin binolarda yashamoqda. Ularning «taxminan 400 tasi qulash xavfi ostida». Bu binolar yaqinlashib kelayotgan qish faslidagi yogʻingarchiliklar oqibatida qulab tushishi ehtimoli juda katta.

Birlashgan Millatlar Tashkilotining maʼlum qilishicha, Isroilning Gʻazodagi ikki yillik genotsid urushi davomida 61 million tonnaga yaqin vayronalar va chiqindilar yuzaga kelgan. Ularni tozalash uchun esa yetti yil vaqt ketishi mumkin.

Rossiyaning Ukrainaga hujumlari

Chorshanba kuni Ukrainaning janubiy qismida Rossiya dronlari yoʻlovchi avtobusi va poyezdga zarba berishi oqibatida besh kishi halok boʻldi. Ukraina rasmiylari eʼlon qilgan suratda derazalari parchalangan oq rangli transport va uning yon tomonida qon izlari aks etgan.

Politsiya xabariga koʻra, front chizigʻiga yaqin joylashgan Nikopol shahri hududida yoʻlovchi avtobusiga uyushtirilgan dron hujumi oqibatida toʻrt erkak va bir ayol halok boʻlgan, yana yetti kishi yaralangan.

«Bunda hech qanday harbiy mantiq yoʻq, bu shunchaki navbatdagi vahshiylik harakatidir», deb yozdi Ukraina prezidenti Volodimir Zelenskiy.

Shuningdek, Rossiya droni Ukrainaning janubiy qismidagi Mikolayev viloyatida ham yoʻlovchi poyezdiga hujum qilgan. Transportdagi barcha yoʻlovchi va ekipaj aʼzolari evakuatsiya qilingan va jarohat olmagan. Rasmiylarga koʻra, birinchi zarbadan soʻng poyezd yana ikki marta hujumga uchragan.

Ukrainaning hududiy rasmiylari kecha turli hududlarda boshqa qurbonlar ham boʻlgani haqida xabar berishdi.

Xususan, Rossiya hujumlaridan Xerson va Odessada jami 2 kishi halok boʻldi. Shimoldagi Sumi va Ukrainaning markaziy qismidagi Kropivnitskiy shaharlarida esa oʻndan ortiq odam jarohat oldi.

Ukraina temiryoʻl operatorining Reuters'ga maʼlum qilishicha, Rossiya joriy yilda 120 ta yoʻlovchi vagoni, 304 ta lokomotiv hamda 43 ta temiryoʻl stansiyasiga zarba bergan.

Soʻnggi oylarda Moskva va Kiyev bir-birining harbiy salohiyatiga toʻsqinlik qilish maqsadida logistika hamda boshqa iqtisodiy obyektlarga oʻzaro hujumlar uyushtirmoqda.

Ammo urush davomida Ukraina ham, Rossiya ham tinch aholini ataylab nishonga olganini inkor etib keladi.

Belarus siyosiy mahbuslarni ozod qiladi

AQSH prezidenti vakilining maʼlum qilishicha, Belarus Vashington sanksiyalarini yanada yumshatish evaziga 25 nafar mahbusni ozod qiladi.

«Biz oraliq kelishuvga erishdik va ezgu niyat ramzi sifatida Belarus 25 kishini ozod qiladi. Buning evaziga Qoʻshma Shtatlar ikkita kompaniyadan sanksiyalarni olib tashlaydi», dedi elchi Jon Koul Minskda jurnalistlarga.

Xabarlarga koʻra, Koul mart oyidagi tashrifi chogʻida 250 nafar mahbusni ozod qilishni soʻragandi. AQSH maxsus elchisi tomonlar hal etilmagan masalalarni yechish va yanada koʻproq odamlarni ozod qilish ustida ishlashini aytdi.

AQSH ikki kompaniyani sanksiyalar roʻyxatidan chiqarish bilan birga, Belarusning muzlatib qoʻyilgan oʻnlab million dollarlik aktivlarini ham blokdan chiqaradi.

Lukashenko 2020-yilda oʻzining qayta saylanishiga qarshi oʻtkazilgan namoyishlarni bostirganidan soʻng, Belarusda yuzlab odamlar hanuz qamoqda qolmoqda. Oʻshanda Gʻarb davlatlari Lukashenkoning muxolifatga nisbatan qatagʻoni sababli mamlakatga qarshi sanksiyalar kiritgandi.

Maʼlumotlarga koʻra, hukumat hali ham 900 dan ortiq siyosiy mahbusni tutqunlikda saqlamoqda. Hibsga olinganlar ekstremizm, hokimiyatni egallashga til biriktirish, nafrat uygʻotish yoki prezidentni haqorat qilishda ayblangan. Ammo Lukashenkoning oʻzi siyosiy mahbuslar borligini rad etadi.