Amerika razvedkasi Vladimir Putin yaqin bir necha yil ichida alyans mamlakatlaridan biriga cheklangan hujum uyushtirib, «NATOning qat’iyatini sinab ko‘rishi» mumkin, deb hisoblaydi. Bunday taxminlar yangi razvedka hisobotlarida mavjud, deb yozadi The Wall Street Journal.
AQShdagilar shu paytgacha Ukrainadagi harbiy harakatlar davom etayotgan bir paytda Putin NATO bilan mojaroda keskinlik keltirib chiqarmaydi, deb hisoblardi. Biroq, endi baholar o‘zgargan: tahlilchilar fikricha, Rossiya-Ukraina urushida ko‘zga ko‘rinadigan muvaffaqiyatlar yo‘qligi fonida Rossiya prezidentiga qandaydir sezilarli g‘alaba kerak. WSJ nashri yozishicha, «burchakka siqib qo‘yilgan Putin yanada xavfliroq bo‘lib qolishi mumkin» degan xavotirlar mavjud.
Razvedka tomonidan ko‘rib chiqilayotgan ehtimoliy tahdidlar ko‘lami darajasiga ko‘ra o‘zgarib turadi – kiberhujumlar yoki biror bir hududni bosib olish uchun diversantlar yuborishdan tortib, NATOning sharqiy qanotidagi mamlakatlardan biriga cheklangan tarzda bostirib kirishgacha. Oxirgi ssenariyning ehtimoli past deb baholanmoqda, biroq vaqt o‘tishi bilan ehtimol ortib boradi.
Amerika rasmiylari fikricha, ehtimoliy hujumdan maqsad alyansni parchalash bo‘lishi mumkin. Keng ko‘lamli bosqin NATO Nizomining Kollektiv mudofaa to‘g‘risidagi beshinchi moddasini ishga tushirishga sabab bo‘ladi – ammo gibrid hujumlar yoki kiberhujumlar amalga oshirilgan holatlar uchun alyansda aniq belgilangan harakat rejasi yo‘q. Masalan, Putin AQSh bunday holatda ittifoqchilarga faqat cheklangan yordam ko‘rsatishi mumkinligiga umid qilishi mumkin.
Amerika razvedkasiga ko‘ra, Rossiya tomondan tajovuzkor harakatlar 2026-yil kuzidan 2029-yilga qadar bo‘lgan oraliqda kuzatilishi mumkin.
NATOdagilar WSJ’ga bergan rasmiy izohida «muntazam ravishda turli ssenariylar o‘ylanishi» va ularga tayyorgarlik ko‘rilishini aytishgan. Alyans vakili Martin OʼDonnell tashkilot «zarurat tug‘ilganda tiyib turish va mudofaalanishga tayyorligi»ni namoyish etishda davom etayotganini ta’kidlagan.
Litva mudofaa vaziri Robertas Kaunas shu kunlarda Rossiya Boltiqbo‘yi mamlakatlaridagi muhim infratuzilmaga zarba berish imkoniyatini ko‘rib chiqayotganini aytgandi. Uning so‘zlariga ko‘ra, buning uchun Moskva Ukrainaning qo‘lga olingan dronlaridan foydalanishi mumkin. Kaunas G‘arb ittifoqchilari orasida Ukrainaga bo‘lgan ishonchni yo‘qotish va uni qo‘llab-quvvatlashni kamaytirish ehtimoliy hujumlarning maqsadi bo‘lishini aytgan. Shu bilan birga, u hozircha «to‘g‘ridan to‘g‘ri tahdid» yo‘qligini qayd etgan.
