Ukraina dronlari Novorossiysk portiga yoppasiga hujum qildi

12-avgustga o‘tar kechasi Ukraina qurolli kuchlari Rossiya harbiy-dengiz flotining Novorossiysk portidagi bazasiga yopirilma hujum uyushtirgandi. 13-avgust kuni ushbu port «mashg‘ulotlar davrida» yopilishi ma’lum qilindi. «Interfaks» nashri yozishicha, port akvatoriyasida kemalar va boshqa suzish vositalari harakatiga taqiq 14-avgustdan kuchga kiradi.

Ukraina qurolli kuchlarining Sevastopol akvatoriyasini muntazam ravishda o‘qqa tutishi natijasida Novorossiysk Rossiya Qora dengiz floti kemalari uchun asosiy joylashuv nuqtasiga aylangandi.

Ukraina prezidenti Volodimir Zelenskiy 12-avgust kuni kechqurungi bayonotida ushbu hujumda «Palyanitsa» reaktiv dronlari, «Neptun» raketalari va suvosti dronlari qo‘llanganini aytgandi. «Havo hujumidan mudofaa pozitsiyalari, prichallar va dengiz porti infratuzilmasiga zarba berilgani tasdiqlandi», – deya qayd etgan u. Zelenskiyning so‘zlariga ko‘ra, turli qurollar ishtirokidagi bunday kombinatsiyalangan hujum ilk bor amalga oshirilgan.

Ukraina qurolli kuchlari bosh shtabi zarbalar natijasida «Admiral Makarov» va «Admiral Essen» fregatlari, «Buyan-M» kichik raketa kemasi hamda «Vasil Bikov» patrul kemasi shikastlanganini tasdiqlagan.

Ukraina mudofaa vaziri vazifasini bajaruvchi Yevgeniy Xmara zarba yuzasidan bergan izohida Ukraina qurolli kuchlari «Rossiya harbiy mashinasini ishdan chiqargani»ni aytgan. U xuddi Zelenskiy kabi amaliyotni «noyob» deb atagan. «Kombinatsiyalangan zarba raketalar, reaktiv dronlar va suvosti dronlari orqali berildi», – deya qayd etgan u.

Ukraina razvedka boshqarmasi esa zarbalar oqibatida «Grushovaya» neft bazasi infratuzilmalari hamda Rossiyaning Qora dengizdagi eng yirik terminali hisoblangan «Shesxaris» neft quyish terminali aniq nishonga olinganini ma’lum qilgan.

Hujum oqibatlari Vantor kompaniyasi tomonidan olingan tezkor sun’iy yo‘ldosh tasvirlarida aks etgan. Rossiyadagi harbiy mavzuga ixtisoslashgan «Harbiy darakchi» telegram-kanali kadrlarda «Admiral Essen» va «Admiral Makarov» kemalari zarbaga uchraganini ko‘rish mumkinligi, ammo shikastlanish darajasini aniqlab bo‘lmasligini qayd etgan. Shuningdek, g‘alla terminali infratuzilmasi, neft quyiladigan prichaldagi tanker va non mahsulotlari kombinati binolarida zarba izlarini ko‘rinib turadi.

«Kemalar muntazam zarbalar tufayli Qrimdan Novorossiyskka olib chiqilgandi, katta savol shuki, Qora dengiz floti endi qayoqqa qochishi kerak?» – deya qayd etadi «Harbiy darakchi» muallifi.

Reuters agentligi sohadagi manbalarga tayanib yozishicha, Ukraina qurolli kuchlari hujumlari natijasida Rossiyaning ikkita eng yirik g‘alla terminali o‘z faoliyatini to‘xtatgan. Shikastlanish ko‘lami va ishni qayta tiklash muddati hozircha noma’lum. Tahlilchilar iyul oyidayoq Ukraina dronlarining hujumlari yaqin kelajakda Qora dengiz orqali don eksportini to‘xtatib qo‘yishi – bu esa Afrika va Yaqin Sharq mamlakatlarida narxlar ko‘tarilishiga va ocharchilik xavfiga olib kelishi mumkinligi haqida ogohlantirgan edi.