Biometrik shaxsiy maʼlumotlarni yigʻish boʻyicha sinov boshlanganidan buyon 70 mingga yaqin xorijlik chegara punktlari orqali Rossiyaga kiritilmadi. Mamlakatga kirish uchun jami 14 million kishi biometrik maʼlumot topshirgan. Bu haqda Rossiya IIV matbuot xizmati maʼlum qildi.
Mazkur amaliyot 2024-yil 1-dekabrdan beri amal qilmoqda. Mamlakatga kirayotganlar chegara nazorati vaqtida ikki parametr - fotosurat va barmoq izlari boʻyicha identifikatsiya qilinadi. Ular nazorat-oʻtkazish punktlarida topshiriladi.
“Tizim nafaqat biometrik maʼlumotlarni yigʻishga, balki kirish taqiqlanganidan soʻng mamlakatni tark etib, shaxsiy maʼlumotlarini oʻzgartirgan va Rossiyaga qayta kirishga uringanlarni aniqlashga ham yordam beradi”, - deb taʼkidladi matbuot xizmati.
Dastlab tajribada Moskvaning Sheremetyevo, Domodedovo va Jukovskiy aeroportlari hamda Orenburg viloyatidagi Mashtakovo avtomobil nazorat-oʻtkazish punkti ishtirok etgan. 2025-yil 1-maydan boshlab ularga Vnukovo aeroporti ham qoʻshildi. 2026-yil iyun oyida esa Sankt-Peterburg, Novosibirsk, Krasnoyarsk, Yekaterinburg shaharlari, shuningdek, Oltoy oʻlkasi, Irkutsk, Kurgan, Novosibirsk, Saratov, Orenburg va Omsk viloyatidagi yana 11 ta nazorat-oʻtkazish punkti biometrik maʼlumotlarni yigʻish tizimlari bilan jihozlandi.
