Ichki ishlar organlarida xizmatga nomzodlarni tanlab olish tadbirlarini tashkil etish va o‘tkazish tartibi to‘g‘risidagi yo‘riqnomaga qo‘shimcha va o‘zgartirish kiritish loyihasi ishlab chiqildi.
Loyiha bilan IIV tizimidagi jamoat xavfsizligi aviatsiyasi mutaxassislarini xizmatga qabul qilish jarayoniga oid alohida qoidalar kiritilishi nazarda tutilmoqda.
Xususan, yo‘riqnomaning tegishli bandidagi mutaxassisliklar qatoriga «yuridik ta’minlash»dan keyin «jamoat xavfsizligi aviatsiyasi» yo‘nalishini ham kiritish taklif qilingan.
Shuningdek, jamoat xavfsizligi aviatsiyasi va axborot texnologiyalari bo‘linmalariga xizmatga kirish istagini bildirgan hamda ushbu sohalarda mutaxassis bo‘lgan nomzodlarni o‘rganish tartibiga aniqlik kiritilmoqda.
Taklif etilayotgan tartibga ko‘ra, bunday nomzodlar o‘rganish bosqichidan antropometrik parametrlar tatbiq etilmagan holda o‘tadi. Bunda ularning sog‘lig‘i ichki ishlar organlarida umumiy xizmatga yaroqlilik darajasiga qo‘yiladigan talablar asosida baholanadi.
Shu tariqa, loyiha qabul qilinsa, jamoat xavfsizligi aviatsiyasi va axborot texnologiyalari sohasidagi mutaxassislarni ichki ishlar organlarining tegishli bo‘linmalariga xizmatga qabul qilishda antropometrik ko‘rsatkichlarga oid talablar qo‘llanilmaydi.
Hujjat hozircha loyiha bo‘lib, undagi normalar belgilangan tartibda qabul qilinganidan keyin kuchga kiradi.
