Finlandiya Tashqi ishlar vazirligi 21-avgust, juma kuni Rossiya elchisi Pavel Kuznetsov vazirlikka chaqirilganini maʼlum qildi. Bunga Rossiyaning razvedka samolyoti Finlandiya havo hududini buzgan boʻlishi mumkinligi sabab boʻlgan.
Finlandiya chegara qoʻriqlash xizmati maʼlumotlariga koʻra, gap Rossiyaning Il-20 samolyoti haqida ketmoqda. Samolyot bir kun avval Finlandiya havo hududiga kirib, u yerda taxminan uch daqiqa davomida harakatlangan.
Hodisa Fin koʻrfazining gʻarbiy qismida sodir boʻlgan. Finlandiya rasmiylari voqea tafsilotlarini oʻrganmoqda. Rossiya elchisining Tashqi ishlar vazirligiga chaqirilishi ham hodisa yuzasidan Moskva tomonining izohini olish bilan bogʻliq.
Bundan avval, iyul oyi oxirida Finlandiya Qurolli kuchlari mamlakat janubiy sohillarida, Rossiya bilan chegaraga yaqin hududda havo makonining muayan qismini yopgan va dengizda harakatlanishga cheklovlar joriy qilgan edi.
Reuters maʼlumotiga koʻra, bu qaror Rossiyadagi nishonlarga yoʻnaltirilgan Ukraina dronlari NATOga aʼzo davlatlar havo hududiga kirib qolishi bilan bogʻliq bir qator hodisalardan keyin qabul qilingan. Bunday holatlar, xususan, Finlandiya, Estoniya va Latviyada qayd etilgan.
