Vazirlikning maʼlum qilishicha, soʻnggi vaqtlarda vaʼda qilingan mablagʻlar berilmayotgani yuzasidan yuzlab murojaatlar kelib tushgan. Ayrim shaxslar loyihalarga ovoz toʻplash uchun fuqarolarga pul yoki boshqa moddiy qiymatliklarni taklif qilmoqda, biroq keyinchalik vaʼdasini bajarmayapti.
Qayd qilinishicha, «Tashabbusli byudjet» doirasida ovoz berish faqat «Ochiq byudjet» axborot portali, uning Android va iOS ilovalari hamda Telegram’dagi rasmiy bot orqali amalga oshiriladi.
Amaldagi tartibga koʻra, ovoz berish uchun fuqarolardan pul undirilmaydi va berilgan ovozlar uchun moddiy ragʻbatlantirish nazarda tutilmagan.
Ovoz berish jarayoni 31-avgust soat 23:59 gacha davom etadi.
Vazirlik norasmiy botlardan foydalanmaslik, shaxsiy maʼlumotlarni begona shaxslarga bermaslik hamda firibgarlik holatlaridan ehtiyot boʻlishga chaqirdi.
