Avtomobil egalari qaysi brendga koʻproq sodiq qolmoqda?
|09:191 6534 min
Avtomobil xaridorlarining yarmidan koʻpi keyingi mashinasini tanlashda avval foydalangan brendiga sodiq qolmoqda. Biroq bu koʻrsatkich kompaniyalar kesimida keskin farq qiladi. 2026-yilgi reytingda Tesla 64 foizlik natija bilan birinchi oʻrinni egalladi. Keyingi oʻrinlardan Ferrari, Toyota, Subaru va Honda joy oldi.
Foto: REUTERSFoto: REUTERS
Reyting S&P Global Mobilityʼning 2026-yilgi maʼlumotlari asosida tuzilgan boʻlib, ular Automotive News tomonidan eʼlon qilingan. Statistika 2026-yil may oyiga qadar amalga oshirilgan avtomobil savdolarini qamrab oladi.
Tadqiqotda «mijozlar sadoqati» deganda avtomobil egasining transport vositasini almashtirish vaqtida, aniq modelidan qatʼi nazar, yana oʻsha brend avtomobilini xarid qilishi tushuniladi.
Umuman olganda, avtomobil va elektromobil xaridorlarining salkam yarmidan koʻpi keyingi mashinasini sotib olishda oʻzi avval foydalangan markani yana tanlamoqda. AQSH avtomobil bozori boʻyicha oʻrtacha sadoqat darajasi 52 foizni tashkil etgan.
Reytingda Tesla 64 foizlik koʻrsatkich bilan birinchi oʻrinni egalladi. Bu ikkinchi yirik ommaviy koʻrsatkichlardan biri boʻlgan Toyota natijasidan 4 foiz punktga va AQSH avtomobil bozori boʻyicha oʻrtacha darajadan 12 foiz punktga yuqori.
2003-yilda tashkil etilgan Tesla 2020-yilda ilk bor toʻliq yil yakunlari boʻyicha foyda bilan ishlagan. Keyingi davrda kompaniya koʻp vaqt davomida bozor kapitalizatsiyasi boʻyicha dunyodagi eng qimmat avtomobil ishlab chiqaruvchilardan biri boʻlib keldi.
2025-yilda Tesla AQSH bozorida qariyb 600 mingta elektromobil sotgan.
Tesla mijozlarining yuqori sadoqati kompaniyaning AQSH elektromobillar bozoridagi kuchli pozitsiyasi bilan ham uygʻunlashadi. Brend avtomobillari mamlakatda sotilayotgan elektromobillarning qariyb yarmini tashkil etadi.
Biroq kompaniyaning global natijalari bir xil emas. 2025-yilda Teslaʼning jahon boʻyicha sotuvlari avvalgi yilga nisbatan 9 foizga kamaygan. Bunga raqobatning kuchayishi va kompaniya bosh direktori Ilon Mask faoliyatiga nisbatan turlicha munosabat ham taʼsir qilgani qayd etilgan.
Teslaʼdan keyin mijozlar sadoqati boʻyicha Ferrari joylashdi. Italiyaning lyuks avtomobillar ishlab chiqaruvchisi 61 foizlik natija bilan ikkinchi oʻrinni egallagan.
Ferrari yaqinda oʻzining elektr modeli bilan ham chiqdi. Shunga qaramay, brendning asosiy ustunliklaridan biri uning oʻziga xos imiji va xaridorlari orasida shakllangan yuqori sadoqat darajasi boʻlib qolmoqda.
Mavzuga oid
Keyingi uch oʻrinni Yaponiya avtomobil brendlari egallagan. Toyotaʼda mijozlar sadoqati 60 foiz, Subaruʼda 59 foiz, Hondaʼda esa 58 foizni tashkil etgan.
Yaponiya avtomobil ishlab chiqaruvchilari uzoq yillardan beri ishonchli va nisbatan hamyonbop mashinalar ishlab chiqaruvchi kompaniyalar sifatida obroʻga ega.
Ayniqsa, Toyotaʼning natijasi eʼtiborga molik. Chunki kompaniya jahon avtomobil bozorida juda katta miqyosda faoliyat yuritadi. Uning Corolla modeli esa dunyoda eng koʻp sotilgan avtomobil modellaridan biri hisoblanadi.
Shu bilan birga, barcha mashhur brendlarda ham mijozlar sadoqati yuqori emas. Qator kompaniyalarda bu koʻrsatkich AQSH bozori boʻyicha 52 foizlik oʻrtacha darajadan past boʻlgan.
Reytingning quyi qismida ham Amerika, ham boshqa davlatlarga tegishli avtomobil brendlari mavjud.
Aston Martin va Polestar mijozlarining atigi 37 foizi keyingi mashinasini tanlashda yana shu brendga sodiq qolgan. Ramʼda esa koʻrsatkich 39 foizni tashkil etgan.
Shunday qilib, reyting yetakchisi Tesla bilan Aston Martin va Polestar oʻrtasidagi farq 20 foiz punktdan ham oshadi.
Ayrim premial avtomobil brendlarida natija biroz yuqoriroq. Porsche mijozlarining 46 foizi yana shu brendni tanlagan boʻlsa, Lincolnʼda bu koʻrsatkich 45 foizni tashkil etgan. Rolls-Royce mijozlarining sadoqat darajasi esa 42 foiz boʻlgan.
Umuman, reyting avtomobil brendining kattaligi yoki uning premial maqomi mijozlarning keyingi xaridda yana shu markani tanlashini avtomatik ravishda kafolatlamasligini koʻrsatmoqda.
Xaridorlarning qarorlariga brend obroʻsi, avtomobillarning ishonchliligi, modellar tanlovi, narx va kompaniyaning bozordagi mavqei kabi omillar taʼsir koʻrsatadi.
2026-yilgi natijalarga koʻra, Tesla bu borada eng yuqori koʻrsatkichga ega boʻlib, uning har uch mijozidan qariyb ikki nafari keyingi avtomobil xaridida ham shu brendni tanlamoqda.
