Rossiya va Ukraina muzokaralar haqida gapirmoqda, Gʻarbiy sohilda yana zoʻravonliklar – kun dayjesti

Al-Mugʻayyir qishloq kengashining BBCʼga maʼlum qilishicha, 19 yoshli Umar al-Nassan va 16 yoshli Xalil Abu Aliya isroillik koʻchmanchilarning qoʻylarni oʻgʻirlashiga toʻsqinlik qilmoqchi boʻlganida oʻldirilgan. Shundan soʻng toʻqnashuvlar kelib chiqqan.

Isroil armiyasi oʻz kuchlari – qishloqqa chorva mollarini «qaytarib olishga urinayotgan» isroillik fuqaro va politsiyaning xavfsizligini taʼminlash uchun kirganini maʼlum qildi.

Harbiylar – qoʻshinlarga tosh otishning «asosiy tashabbuskorlari» deb atalgan falastinliklarga qarata oʻq uzgan va ularni urgan.

Bu oʻlim holatlari Gʻarbiy sohilda koʻchmanchilar zoʻravonligining keskin kuchayishi fonida yuz bermoqda. BMT maʼlumotlariga koʻra, joriy yilda kuniga oʻrtacha uchtadan ortiq hujum qayd etilgan.

Yil boshidan beri Gʻarbiy sohilda Isroil kuchlari yoki koʻchmanchilar tomonidan kamida 81 falastinlik oʻldirildi. Xuddi shu davr mobaynida Gʻarbiy sohilda falastinliklar tomonidan uch nafar isroillik oʻldirilgan.

Isroil armiyasi koʻchmanchilarning falastinliklarga qaratilgan hujumlarida faol ishtirok etayotgani yoki chetdan qarab turgani uchun keskin tanqidlarga duch kelmoqda.

Inson huquqlari tashkilotlari Gʻarbiy sohilda koʻchmanchilar manzilgohlari koʻpayishini «etnik tozalash» kampaniyasining bir qismi deb aytmoqda.

Nepaldagi halokat

Oʻtgan haftada Nepalda yuz bergan halokatli toshqinlar oqibatida kamida 2,5 milliard dollarlik mol-mulk, uy-joy va infratuzilma yoʻqotildi. Bu haqda mamlakat tabiiy ofatlarga qarshi kurashish boshqarmasi rahbari Dharma Raj Reutersʼga maʼlum qildi.

Dastlabki toʻrt oyda yoʻllar va vaqtinchalik boshpanalar qurish, kommunal xizmatlarni tiklash uchun taxminiy xarajatlar qariyb 52,6 million dollarni tashkil etadi.

«Bular taxminiy miqdorlar. Biz buni turli tegishli idoralar va departamentlar bilan muvofiqlashtirilgan holda hisoblab chiqdik», dedi Nepal rasmiysi va tez orada batafsil baholash boʻlishini aytdi.

Loy koʻchkisidan toʻqqiz kun oʻtib - juma kuni Trishuli daryosidagi gidroelektr stansiyasiga tutash tunneldan ikki kishi tirik olib chiqildi. Rasmiylar taxminiga koʻra, halokatda daryo boʻyidagi oltita gidroenergetika loyihasiga tegishli tunnellarda kamida 900 kishi qamalib qolgan.

26-avgust kun Nepal va Tibet chegarasida yuz bergan fojia oqibatida loy ostidan 1 250 dan ortiq odam jasadi chiqarib olingan. Yana 4 200 kishi bedarak yoʻqolgan. Toshqindan zarar koʻrgan hududlarda 20 mingga yaqin uyni qayta qurishga toʻgʻri keladi, ushbu uylarning kamida 7 500 tasi toʻliq vayron boʻlgan.

Kongodagi virus xavfi

Kongo hukumati maʼlumotlariga koʻra, Ebola bezgagi avj olishi oqibatida halok boʻlganlar soni 3000 dan oshgan. Reutersʼning yozishicha, mamlakatdagi keng koʻlamli epidemiya shimoli-sharq boʻylab tarqalishda davom etmoqda.

«Kasallik tarqalishining barcha zanjirlari topilib, uzilmaguncha epidemiya davom etaveradi. U Kongo, uning qoʻshnilari hamda butun mintaqa uchun tahdid boʻlib qoladi», dedi JSST rahbari.

Uning soʻzlariga koʻra, oʻlim holatlarining aksariyati kasallik bilan aloqada boʻlgan deb hisoblanmagan odamlar orasida yuz bergan.

«Bu bizga nomaʼlum boʻlgan infeksiya yuqish zanjirlari mavjudligini anglatadi. Vafot etganlarning koʻpchiligi hanuzgacha xavfli usullarda dafn etilmoqda, bu esa infeksiyaning yanada tarqalishiga sabab boʻlyapti», deb taʼkidladi Tedros Gebreyesus.

U xalqaro hamjamiyatni Kongo hukumati tomonidan ishlab chiqilgan va 1,3 mlrd dollar talab etiladigan Ebola epidemiyasiga qarshi rejani moliyalashtirishni jadallashtirishga chaqirdi.

JSST oktabr-noyabr oylarida potensial vaksinalar samaradorligi boʻyicha klinik sinovlarni boshlashni rejalashtirmoqda. Davolash usullari boʻyicha sinovlar esa allaqachon olib borilmoqda.

Ukrainadagi urush

Rossiya va Ukraina diplomatik muzokaralar bilan birga harbiy harakatlarni ham tindirmayapti. 4-sentabrga oʻtar kechasi Ukraina dronlarining Sochi shahri va Sirius posyolkasiga uyushtirgan hujumi oqibatida neft bazasi hududida yongʻin sodir boʻldi.

«Astra» nashriga koʻra, bu Adler tumanidagi «Rosneft-Kubannefteprodukt» obyektidir. Dastlabki maʼlumotlarga koʻra, jabrlanganlar yoʻq. Bir nechta turar joy va binolarning oynalari shikastlangan, Sochi ustida qora tutun koʻrinmoqda.

Ukraina monitoring kanallariga koʻra, Ukraina dronlari havo hujumidan mudofaa qurilmalari – S-300 yoki S-400 zenit-raketa majmualariga ham hujum qilgan. Xususan, zarbalardan biri Sirius posyolkasi hududiga – HHM divizioni joylashgan yerga kelib tushgan. Zarba berilgan joyda yongʻin boshlangan.

Shu bilan birga, 4-sentabrga oʻtar kechasi Rossiya qoʻshinlari ham Odessaga ommaviy zarbalar berdi.

Rasmiylarga koʻra, Odessaning tumanlaridan birida turar joy binolari va avtomobillar shikastlangan: toʻqqiz qavatli uy zarba ostida qolgan. Oqibatda bir kishi halok boʻlib, yana uch kishi jarohatlangan.

Rossiya harbiylari soʻnggi oylarda mintaqaga deyarli har kuni hujum qilmoqda. Mudofaa vazirligi ushbu zarbalardan maqsad - Ukraina armiyasi bilan bogʻliq portlar va omborlar ekanini taʼkidlamoqda.