Yangi arena 51 252 nafar tomoshabinga moʻljallangan boʻlib, futbol oʻyinlari va boshqa yirik sport tadbirlarini oʻtkazish boʻyicha xalqaro talablar hisobga olingan holda barpo etilgan. Sakkiz qavatli inshoot anʼanaviy qirgʻiz oʻtovi shaklida qurilgan.
Binoning diametri 280 metr, balandligi esa 70 metrni tashkil etadi. Majmuaning umumiy maydoni 194,2 ming kvadrat metrga yetadi.
Majmuada bevosita stadiondan tashqari, rivojlangan tijorat va koʻngilochar infratuzilma ham koʻzda tutilgan. Bu yerda 23 ta restoran, 11 ta kafe, savdo markazi, supermarket, 48 ta doʻkon, 18 ta kiosk, toʻrtta kinoteatr, sport zali, bolalar maydonchasi va ayvonlar joylashgan. Tijorat obyektlari uchun qariyb 36 ming kvadrat metr maydon ajratilgan.
Ushbu obyektlar daromad keltirib, davlat byudjetiga qoʻshimcha yuk boʻlmasdan, stadionni saqlash xarajatlarini qoplash imkonini berishi kutilmoqda.
Dastlab Bishkekda 30–35 ming tomoshabinga moʻljallangan ixchamroq stadion qurish rejalashtirilgan edi. Biroq keyinchalik loyiha qayta koʻrib chiqildi: sigʻimi 51 mingdan ortiq oʻringa koʻpaytirildi, obyektning oʻzi esa yirik koʻp funksiyali sport majmuasiga aylantirildi. Qurilishning yakuniy qiymati 386 million dollarni tashkil etdi.
«Bishkek Arena» allaqachon yirik tadbirlarni qabul qila boshladi. 31-avgust kuni yangi stadionda VI Butunjahon koʻchmanchilar oʻyinlarining ochilish marosimi boʻlib oʻtdi.
