Oʻtgan kun davomida jahonda roʻy bergan eng asosiy voqea va yangiliklar sharhi bilan kundalik xabarnomada tanishtiramiz. Zelenskiyning samolyoti Moldovadan uchishga tayyorlanayotganida dron bilan toʻqnashishiga bir baxya qolgan. Eron Hoʻrmuz boʻgʻozida AQShning zamonaviy suvosti dronini qoʻlga olganini maʼlum qildi. AQSH va Kanada oʻrtasidagi savdo urushi yanada kuchaymoqda. BMT Isroilning Suriyadagi ayrim harakatlari urush jinoyatiga tenglashtirilishi mumkinligidan ogohlantirdi.
Zelenskiy samolyotiga dron yaqinlashdi
Ukraina prezidenti Volodimir Zelenskiyning samolyoti Moldovadan Norvegiyaga uchishga tayyorlanayotganida dron bilan toʻqnashishiga bir baxya qolgan. Bu haqda Norvegiya bosh vaziri Yonas Gar Store maʼlum qildi.
Hodisa Zelenskiy Norvegiya qiroli Harald Beshinchining dafn marosimida ishtirok etish uchun Osloga yoʻl olgan paytda yuz bergan. Dron xavfi tufayli Moldova havo hududini vaqtincha yopgan va Zelenskiyning samolyoti parvozi kechiktirilgan.
Moldova rasmiylariga koʻra, bu vaqtda rossiyaliklarning ikkita droni mamlakat havo hududiga kirib kelgan. Ulardan biri poytaxt Kishinyovdan 160 kilometrcha uzoqlikdagi hududga qulagan. Norvegiya bosh vaziri esa dron Zelenskiyning samolyotiga juda yaqin kelganini aytgan, ammo ular oʻrtasidagi masofa boʻyicha aniqlik kiritmagan.
AQShning suvosti droni qoʻlga olindi
Eron Islom inqilobi qoʻriqchilari korpusi Hoʻrmuz boʻgʻoziga kirish qismida AQShga tegishli boʻlgan zamonaviy suvosti dronini qoʻlga olganini maʼlum qildi.
Gap AQShning Dive-LD avtonom suvosti apparati haqida ketmoqda. Eron tomoni ushbu dronni «AQSH armiyasining eng zamonaviy va aqlli boshqaruvchisiz suvosti qurilmalaridan biri» deb atagan.
Dive-LD’ni AQShning Anduril kompaniyasi ishlab chiqargan. U mustaqil ravishda harakatlanadi, undan dengiz tubini xaritalash, razvedka, minalarni aniqlash va suvosti infratuzilmasini tekshirish uchun foydalanish mumkin.
AQSH tomoni esa apparat nosozlik sababli ishdan chiqqani va unda maxfiy maʼlumotlar yoki sezgir sensorlar boʻlmaganini bildirgan.
«Tramp dividendlari»
AQSH prezidenti Donald Tramp agar noyabr oyida boʻlib oʻtadigan oraliq saylovlarda Respublikachilar Vakillar palatasi va Senat ustidan nazoratni saqlab qoladigan boʻlsa, AQShning har bir voyaga yetgan fuqarosiga 5 ming dollardan toʻlashga vaʼda berdi.
U Respublikachilar partiyasining Texas shtati Dallash shahrida oʻtgan qurultoyida buni «muvaffaqiyatli kompaniyalarning investorlarga dividend toʻlashi»ga oʻxshatgan.
«Yagona cheklov shundaki, dividendlar AQShda sarflanishi kerak. Biz pullarni Kanadaga borib sarflashingizni xohlamaymiz. Biz sizning Xitoyga, Germaniyaga borishingizni istamaymiz... Siz pullarni AQShda sarflashingiz kerak», – deya qoʻshimcha qildi Tramp.
Qayd etish kerakki, bu tarixda Amerika prezidenti saylovchilar ovozini jalb qilish kampaniyasi doirasida amerikaliklarga bunday toʻlovlar vaʼda qilayotgan birinchi holatdir.
2025-yilda AQShning balogʻatga yetgan aholisi soni 267 mln kishi atrofida boʻlgan. Bu shuni anglatadiki, ularning barchasiga «Trampning 5 ming dollarlik dividendlari»ni toʻlash uchun jami 1,34 trln dollar kerak boʻladi.
AQSH va Kanada oʻrtasidagi savdo urushi
AQSH va Kanada oʻrtasidagi tariflar boʻyicha qarama-qarshilik yanada kuchaydi.
Kanada 8-sentabrdan AQShdan import qilinadigan qator mahsulotlarga 15, 25 va 50 foizlik javob tariflarini joriy qildi. Yangi choralar AQShdan keladigan 27,6 milliard dollarlik tovarlarga taalluqli.
Kanada asosan metall, alyuminiy, sut mahsulotlari, maishiy texnika, qishloq xoʻjaligi uskunalari, qogʻoz, plastmassa va elektronika kabi mahsulotlarga qoʻshimcha boj joriy qildi. Ayrim tovarlarga tarif 50 foizgacha oshirilgan.
AQSH esa Kanadadan keladigan ayrim mahsulotlarga yangi import taqiqlarini joriy etishini maʼlum qildi. Ular orasida alkogol mahsulotlari, zardob, melassa va yirik mototsikllar bor. Taqiqlar 29-sentabrdan kuchga kirishi kutilmoqda.
Isroil urush jinoyatida gumonlanmoqda
BMTning Suriya boʻyicha mustaqil tergov komissiyasi Isroilning Suriya hududidagi harbiy harakatlaridan jiddiy xavotir bildirib, ayrim harakatlar urush jinoyatiga tenglashtirilishi mumkinligini maʼlum qildi.
Komissiya Isroil harbiy faoliyati Suriya hududida tobora «davomiy va chuqurlashib borayotgani»ni qayd etgan. Tergov doirasida Isroil tomonidan 49 kishi, jumladan, ikki nafar bola ushlab turilgani haqida ham maʼlumotlar keltirilgan.
BMT komissiyasi Isroilning Suriyadagi harakatlari xalqaro gumanitar huquq nuqtayi nazaridan tekshirilishi zarurligini taʼkidladi.
Apple 18 taqdimoti
Apple kompaniyasi tunda iPhone 18 Pro va iPhone 18 Pro Max smartfonlarini taqdim etdi. Yangi modellar A20 Pro chipi, takomillashtirilgan kamera va uzoqroq ishlaydigan akkumulyator bilan jihozlangan. Asosiy kamera ilk bor oʻzgaruvchan diafragmaga ega boʻldi. Kompaniya iPhone 18 Pro Max’da akkumulyator avtonomligi boʻyicha eng katta oʻsish qayd etilganini aytmoqda.
Biroq taqdimotning eng katta yangiligi – Apple’ning tarixdagi ilk buklanuvchi smartfoni iPhone Duo boʻldi. U kitob singari ochiladi va ochilganda 7,6 dyuymli katta ekranga ega boʻladi. Smartfon koʻp vazifali rejimni qoʻllab-quvvatlaydi va Apple Pencil bilan ishlaydi. Yangi qurilmaning boshlangʻich narxi 1 999 dollar etib belgilandi.
iPhone 18 Pro 1 199 dollar, Pro Max esa 1 299 dollardan sotuvga chiqadi. Yangi smartfonlarga buyurtmalar 12-sentabrdan qabul qilinadi, sotuvlar esa 18-sentabrdan boshlanadi.
