Varshavada oʻtkazilgan tanlovda kompaniya GPS signalisiz ham harakatlana oladigan va kuchli radioelektron kurash sharoitida ish qobiliyatini saqlab qoladigan avtonom zarba platformalari oilasini taqdim etgan.
Tanlov oldiga qoʻyilgan vazifa oddiy aviabaza yoki uchish-qoʻnish yoʻlagini bir marta nishonga olishdan koʻra murakkabroq edi. NATO dushman aerodromiga shunchaki zarar yetkazish emas, balki uning faoliyatini uzoq muddatga falaj qilib qoʻya oladigan arzon va keng koʻlamda qoʻllanadigan tizimlarni izlagan.
Sababi, uchish-qoʻnish yoʻlaklari nisbatan tez taʼmirlanishi mumkin. Samolyotlarni boshqa maydonlarga tarqatib yuborish, yoqilgʻi va oʻq-dori zaxiralarini koʻchirish ham mumkin. Shuning uchun bitta zarba aviabaza faoliyatini faqat qisqa muddatga toʻxtatishi ehtimol.
NATO tanlovida esa aerodromning bir vaqtning oʻzida bir nechta muhim boʻgʻini - uchish-qoʻnish yoʻlaklari, yoqilgʻi obyektlari, taʼmirlash infratuzilmasi, oʻq-dori omborlari, havo mudofaasi vositalari va boshqa elementlarni qayta-qayta izdan chiqaradigan kompleks yechim talab qilingan.
Narwhal qanday raketa?
Gʻolib loyihaning eng muhim elementlaridan biri - Narwhal. Manbaga koʻra, u Chexiyada ishlab chiqilgan ilk qanotli raketa boʻlib, yaqinda sinovlarni yakunlagan.
Yerdan uchiriladigan raketa uzunligi taxminan 4 metr. U Chexiyada ishlab chiqarilgan reaktiv dvigatel bilan jihozlangan va past balandlikda soatiga taxminan 750 kilometr tezlikda harakatlana oladi.
Kompaniya Narwhalʼning jangovar yuk va parvoz masofasi bilan farqlanuvchi bir nechta turini ishlab chiqqan.
Asosiy variant 120 kilogrammgacha portlovchi moddani 680 kilometrgacha olib borishi mumkin. Yengillashtirilgan, 40 kilogrammlik jangovar yukka ega variantda esa parvoz masofasi taxminan 730 kilometrgacha oshadi.
GPSciz ham harakatlana oladi
Narwhalʼning NATO tanlovi uchun eng muhim xususiyatlaridan biri uning navigatsiya tizimi hisoblanadi.
Raketa vizual navigatsiya va yer relefini kuzatib borish texnologiyasidan foydalanadi. Bu unga doimiy GPS signaliga bogʻliq boʻlmasdan parvoz qilish imkonini beradi.
Shu tariqa, GPS signallari toʻsib qoʻyilgan yoki soxtalashtirilgan kuchli radioelektron kurash sharoitida ham raketa vazifasini bajarish imkoniyatini saqlab qolishi koʻzda tutilgan.
