Prezident tomonidan 11-sentabr kuni «Sud hokimiyati organlari faoliyatini moliyalashtirish toʻgʻrisida»gi qonun imzolandi.
Qonun sud hokimiyati organlari faoliyatini moliyalashtirish sohasidagi munosabatlarni tartibga solishni nazarda tutadi.
Hujjatga muvofiq, sudlar faoliyati faqat Oʻzbekiston davlat byudjetidan moliyalashtiriladi. Bunda ajratiladigan mablagʻlar odil sudlovni toʻliq va mustaqil amalga oshirish imkoniyatini taʼminlashi kerak.
Navbatdagi yil uchun davlat byudjeti toʻgʻrisidagi qonunda Konstitutsiyaviy sud, Oliy sud hamda Sudyalar oliy kengashi faoliyatini moliyalashtirish uchun alohida mablagʻlar nazarda tutiladi.
Moliyalashtirish uchun ajratilgan mablagʻlarni taqsimlash ham tegishli sud hokimiyati organlarining oʻzi tomonidan amalga oshiriladi. Xususan, Konstitutsiyaviy sud uchun ajratilgan mablagʻlarni Konstitutsiyaviy sud, Oliy sud mablagʻlarini Oliy sud, Sudyalar oliy kengashiga ajratilgan mablagʻlarni esa Kengashning oʻzi taqsimlaydi.
Harbiy sudlar, Qoraqalpogʻiston Respublikasi sudi, viloyatlar va Toshkent shahar sudlari, shuningdek, hududiy maʼmuriy, fuqarolik, jinoyat, iqtisodiy va boshqa sudlarga ajratilgan mablagʻlarni taqsimlash Oliy sud huzuridagi Sudlar faoliyatini taʼminlash departamenti tomonidan amalga oshiriladi.
Qonun rasmiy eʼlon qilingan kundan eʼtiboran kuchga kiradi.
