AQSH Polshada Amerika armiyasi doimiy bazasini joylashtirishga tayyorlanmoqda. Bu haqda AQSH prezidenti Donald Tramp oʻzining Truth Social sahifasida maʼlum qildi.
«Ajoyib yangilik! Doʻstim, Polsha prezidenti Karol Navrotskining qatʼiy rahbarligi tufayli Polshada AQSH armiyasi bazasini joylashtirishda sezilarli yutuqlarga erishildi», - deb yozdi u.
Trampning taʼkidlashicha, baza joylashadigan joy, katta ehtimol bilan, yaqin vaqt ichida eʼlon qilinadi.
«Bu bizning buyuk Amerika-Polsha ittifoqimiz uchun tarixiy qadam boʻladi. Bu masalaga eʼtiboringiz uchun tashakkur», - deb qoʻshimcha qildi AQSH prezidenti.
Polshada Amerika harbiylarining mavjudligi yangilik emas - hozir u yerda 10 mingga yaqin AQSH harbiy xizmatchisi bor.
Biroq, bu kontingentning katta qismi Atlantic Resolve operatsiyasi doirasida rotatsiya shaklida ishlaydi - qismlar Polshada doimiy joylashmagan, balki muntazam ravishda almashtirib turiladi.
Doimiy baza gʻoyasi birinchi yil muhokama qilinayotgani yoʻq - 2018-yilda Varshava oʻzida «Fort-Tramp» deb ataluvchi bazani joylashtirishni taklif qilgan edi, ammo ish deklaratsiyalar va qoʻshma mashgʻulotlardan nariga oʻtmagan.
