Birlashgan Millatlar Tashkilotining Aholishunoslik jamgʻarmasi (UNFPA) bilan birgalikda demografik barqarorlik masalalariga bagʻishlangan tadbir oʻtkazdik, deb xabar berdi Prezident Administratsiyasi rahbari Saida Mirziyoyeva.
«Oʻzbekistonning eng asosiy kapitali - uning yosh avlodi. Ushbu salohiyat kelgusida demografik dividend manbaiga aylanishi uchun bugundanoq har bir insonning, ayniqsa, ayollar va bolalarning salomatligi, taʼlimi hamda xavfsizligiga investitsiya kiritishimiz zarur.
Bu boradagi saʼy-harakatlarimiz manzilli va uzoq muddatli boʻlishini taʼminlash maqsadida demografik prognozlash tizimini yoʻlga qoʻyyapmiz hamda «Demografik dividend – 2050» strategiyasini ishlab chiqishni rejalashtiryapmiz», deb yozdi u ijtimoiy tarmoqdagi sahifasida.
Uning taʼkidlashicha, mamlakat kelajagi nafaqat aholi soni, balki eng avvalo ular qanday imkoniyatlarga ega boʻlishi bilan belgilanadi.
