Figure AI kompaniyasi gʻayrioddiy usulda F.02 odamsimon robotlar parkini yoʻq qildi. Mashinalar mustaqil ravishda Finlandiyaning Imatra shahridagi quyuv zavodida joylashgan 75 tonnalik elektr yoy pechiga sakradi, shundan soʻng ular erigan metallga aylandi, deb yozdi Interesting Engineering.
Kompaniya yangi avlod F.03 robotlariga oʻtganidan soʻng, eskilarini utilizatsiya qilish zarurati tugʻildi. Eski mashinalarni ishchi holatda saqlash maqsadga muvofiq emas edi, oddiygina qismlarga ajratish esa firma apparat yechimlarini oshkor qilishi va keyingi F.04 modeli ustida ishlashi kerak boʻlgan muhandislarning vaqtini olishi mumkin edi.
Figure AI robotlarni ularning ichki qismlarini ochmasdan yoʻq qilish yoʻlini topishga majbur boʻldi. AQSH va Meksikadagi bir nechta zavodlar mashinalarga oʻrnatilgan litiy-ionli akkumulyatorlar tufayli ularni qabul qilishdan bosh tortdi. Natijada kompaniya Finlandiya korxonasi bilan kelishuvga erishdi.
Yechim izlash jarayonida Figure AI «Afsonalarni yemiruvchilar» shousining sobiq ishtirokchilaridan ham yordam soʻradi. Robotlarni pechga tashlash gʻoyasini keyinchalik loyihaga qoʻshilgan aktyor Arnold Shvarsenegger qoʻllab-quvvatladi. Aynan uning ishtirokida suratga olingan «Terminator» filmidagi robot yakunda metall eritish pechiga tushib, oʻzini oʻzi yoʻq qilgan.
Finlandiyaga joʻnatishdan oldin muhandislar F.02 robotini kerakli nuqtaga sakrashga oʻrgatishdi. Buning uchun San-Xosedagi Figure shtab-kvartirasida katta xavfsizlik yostiqchalari oʻrnatildi va robotlar ikkinchi qavatdan tushishga mashq qildirildi.
Robotlar eritilgandan soʻng, quyma metall shaklida AQShga qaytarildi. Figure AI kompaniyasining taʼkidlashicha, videodagi voqealar kompyuter grafikasi emas: robotlar haqiqatan ham yonib turgan pechga sakragan.
