Kallas bu haqda 5-oktabr kuni Bryusselda Moldova bosh vaziri Vasile Tofan bilan oʻtkazilgan matbuot anjumanida gapirdi.
Yevropa diplomatiyasi rahbari soʻnggi haftalarda qitʼada Rossiya bilan bogʻliq gibrid hujumlar, diversiyaga urinishlar va havo hududi buzilishi holatlari keskin koʻpayganini bildirdi.
«Oʻtgan dam olish kunlarida Rossiya raketalari va dronlari Moldova havo hududini yana buzdi. Bu mutlaqo nomaqbul», - dedi Kallas.
Uning bahosicha, Moskva bunday harakatlar orqali qoʻrquv uygʻotish va Yevropa davlatlarining qaror qabul qilish jarayonini izdan chiqarishga intilmoqda. Kallas bunga javoban xavf-xatarlarga bardoshlilikni oshirish va Ukrainani qoʻllab-quvvatlashni kuchaytirish zarurligini taʼkidladi.
Sentabr oxirida Rossiya Ukrainaning energetika tizimiga zarbalarini kuchaytirgan, Kiyev va mamlakatning boshqa hududlari ham hujumga uchragan. Shu hujumlar fonida Moldova Mudofaa vazirligi mamlakat havo hududiga uchta uchuvchisiz uchish apparati kirganini maʼlum qilgan.
Germaniya kansleri Fridrix Mers ham avvalroq Rossiya tomonidan yangi gibrid hujumlar sodir etilishi mumkinligidan ogohlantirgan edi.
Germaniya rasmiylari Moskva dronlar va kiberhujumlardan foydalangan holda gibrid kampaniya olib borayotganini bir necha bor bildirgan. Jumladan, Berlin avgust oyida Leypsig aeroportida dron yordamida hujum uyushtirishga urinish ortida Rossiya turganini daʼvo qilgan.
