DW xabariga koʻra, Mask 14-oktabr kuni Starshield tizimlari AQSH hukumatiga tegishli va uning nazorati ostida ekanini bildirgan.
U Starlink esa SpaceX’ning tijorat xizmati ekanini taʼkidlagan. Maskning aytishicha, undan fuqarolik yoki mudofaa vazifalarida foydalanish mumkin, ammo hujumkor harbiy operatsiyalarda emas.
Maskning bayonoti Ukrainaning sobiq mudofaa vaziri Mixail Fedorovning dronlar va Starlink tarmogʻi oʻrtasidagi aloqa bosqichma-bosqich tiklanayotgani haqidagi izohiga javob boʻlgan.
Bundan avval Ukraina harbiylari va rasmiylari SpaceX frontda ishlatilayotgan Starlink terminallari faoliyatini ogohlantirmasdan cheklaganini bildirgan edi.
Fedorovning sobiq maslahatchisi Sergey Sternenkoning aytishicha, 14-oktabrga oʻtar kechasi dron tezligi soatiga 60–70 kilometrga yetganda Starlink interneti ishlashdan toʻxtagan. Avval bu chegara soatiga 160 kilometr boʻlgan. Uning maʼlumotiga koʻra, cheklovlar birinchi navbatda Starshield’ga taalluqli boʻlgan.
Ukraina prezidenti Volodimir Zelenskiy Rossiya dronlarini, jumladan, reaktiv dronlarni urib tushiruvchi tutuvchi dronlarning muvaffaqiyatli ishlashi koʻp jihatdan Starlink aloqasiga bogʻliqligini taʼkidlagan.
Rossiyaning Ukrainaga keng koʻlamli bosqini boshlanganidan buyon SpaceX sunʼiy yoʻldosh interneti Ukraina armiyasining frontdagi asosiy aloqa vositalaridan biriga aylangan. U dronlarni boshqarishda ham qoʻllanadi.
Starshield faoliyatidagi cheklovlar Kiyev va AQSH maʼmuriyati munosabatlaridagi taranglik fonida kuzatilgan. Avvalroq Donald Tramp Ukraina Oq uyning soʻrovlariga qaramay, Rossiyadagi neftni qayta ishlash zavodlariga zarba berishda davom etayotganini tanqid qilgan. U Ukrainada yangi prezidentlik saylovlari oʻtkazishga ham chaqirgan.
