Oziq-ovqat narxlari oshishini sekinlashtirish uchun davlat nimalar qilmoqchi? Mamarizo Nurmurodov izoh berdi

O‘zbekistonda oziq-ovqat narxlari barqarorligini ta'minlash borasida yagona davlat strategiyasi ishlab chiqilmoqda. Bu haqda Markaziy bank raisi Mamarizo Nurmurodov ma'lum qildi, deb xabar bermoqda Kun.uz muxbiri.

«Bizni tashvishga solayotgan oziq-ovqat masalasida aytish kerakki, prezident tomonidan hukumatga, tegishli vazirlik va idoralarga ichki bozordagi oziq-ovqat narxlari barqarorligini ta'minlash bo‘yicha chora-tadbirlar ishlab chiqish belgilandi. Hozirgi kunda mamlakatda oziq-ovqat xavfsizligini ta'minlash bo‘yicha yagona davlat strategiyasi ishlab chiqilmoqda.

Strategiya keng qamrovli ichki va tashqi talab va taklif omillarini o‘zida aks ettiradi. Kelgusida bizni xavotirga solayotgan oziq-ovqat narxlari o‘sishining sekinlashishiga xizmat qiladi», – dedi Mamarizo Nurmurodov 22 aprel kungi matbuot anjumanida.

Markaziy bank raisi oziq-ovqat narxlari o‘sishini sekinlashtirish bo‘yicha rejalashtirilayotgan ayrim choralarni sanab o‘tdi.

Importni diversifikatsiya qilish

«Xorijdan olib kelinadigan oziq-ovqat mahsulotlarining import bozorlarini diversifikatsiya qilish. Masalan, yog‘ va shakar kabi mahsulotlarni asosiy hamkorlarimiz Rossiya, Qozog‘istondan olib keladigan bo‘lsak, Janubiy-Sharqiy Osiyo, Lotin Amerikasi davlatlaridan olib kelish borasida ham hukumat tomonidan tegishli ishlar qilinmoqda», – dedi Nurmurodov.

Transport xarajatlarini pasaytirish

«Importda konsentratsiyalashuv darajasini pasaytirish va transport xarajatlarini kamaytirish. Bu borada ko‘rilayotgan chora-tadbirlar inflatsiya darajasini pasaytirishga ijobiy ta'sirini ko‘rsatadi», – dedi MB raisi.

Yetishtirilayotgan va ishlab chiqarilayotgan oziq-ovqat hajmlarini oshirish

«Qishloq xo‘jaligi vazirligi va hudud rahbarlariga oziq-ovqat narxlarini muvozanatlashtirish, meva-sabzavot, ozuqa va yem mahsulotlarining hajmini oshirish borasida ham topshiriqlar berilgan. Zaruriy yer maydonlari va suv resurslari ajratish bo‘yicha tegishli choralar ko‘rilmoqda», – deya qayd etdi Mamarizo Nurmurodov.

Avvalroq, Markaziy bank raisi go‘sht narxi barqarorlashgani haqida gapirgani xabar qilingandi. Nurmurodovga ko‘ra, qoramol importi o‘tgan yilgiga nisbatan 4 barobar oshib, rastalarda go‘sht narxi muvozanatlashgan.

Shuningdek, u imtiyozli kreditlar bank tizimida korrupsiyaga moyillikni oshirishini aytib o‘tgani xabar qilingan edi.

• 22 aprel kuni Markaziy bank boshqaruvi asosiy stavkani yillik 14 foiz darajasida o‘zgarishsiz qoldirish haqida qaror qabul qildi.