Qashqadaryoda ijtimoiy soha va infratuzilmani yaxshilash bo‘yicha ishchi guruhi tuziladi. Bu haqda prezident Shavkat Mirziyoyev aytib o‘tdi.
Ishchi guruhi har haftada 4 kun Qashqadaryoda bo‘lib, ishlarni samarali tashkil etadi, markazlashgan va qo‘shimcha mablag‘larning manzilli hamda maqsadli ishlatilishini nazorat qiladi.
Joriy yilda Qashqadaryoda ijtimoiy soha va infratuzilma bilan bog‘liq eng dolzarb muammolarni hal etish uchun respublika budjetidan qo‘shimcha 360 milliard so‘m ajratiladi.
Shuningdek, Investitsiya vazirligi bu ishlar uchun xalqaro moliya institutlari mablag‘laridan 100 million dollar imtiyozli mablag‘lar yo‘naltiradi.
Qo‘shimcha ajratilayotgan 360 milliard so‘m va 100 million dollar hisobiga ahvoli eng og‘ir bo‘lgan obektlarda bajariladigan ishlarning dastlabki manzilli ro‘yxati shakllantirilgan.
“Bu ishlarni jadal boshlash uchun dushanba kuni Moliya vazirligi 100 milliard so‘m ssuda hamda Investitsiyalar vazirligi 100 milliard so‘m mablag‘ ajratsin”, dedi prezident.
