«Trest-12» kompaniyasi Mustaqillik maydonidagi 431,5 mlrd so‘mlik loyiha pudratchisi sifatida tanlandi. Kompaniya ta'sischilari orasida qurilish vaziri Botir Zokirovning o‘g‘li va rafiqasi ham bor. Vazirga aloqador firma 10 yil ichida 800 mln dollardan ortiq qiymatdagi qurilish-ta'mirlash ishlarini bajargan. Ular orasida yirik davlat buyurtmalari ham talaygina: Vazirlar Mahkamasi, Senat, Moliya vazirligi binolari, «Bunyodkor» stadioni va Islom sivilizatsiyasi markazi shular jumlasidan.
Arxiv foto: Tatiana Dudarenko
Toshkentdagi Mustaqillik maydonida joylashgan ma'muriy binoni ta'mirlash va uning yonidagi favvora ostiga avtoturargoh qurish 431,5 milliard so‘mga tushishi mumkin. Bu haqda davlat xaridlari portaliga ma'lumot joylangan.
Markaziy bankning 12 apreldagi kursiga asosan, 431,5 mlrd so‘m – 41 mln dollardan ortiqni tashkil etadi.
Ushbu yirik davlat buyurtmasi «Trest–12» AJga berilgan. Ushbu kompaniya ta'sischilari orasida qurilish vaziri Botir Zokirovning o‘g‘li va turmush o‘rtog‘i ham bor.
«Gazeta.uz»ning yozishicha, Toshkent shahar hokimiyati huzuridagi «Yagona buyurtmachi xizmati» injiniring kompaniyasi 2019 yil 9 iyul kuni «Trest-12» kompaniyasi bilan buyurtma shartnomasi imzolagan. Shartnoma imzolangan vaqtda loyiha qiymati 207,82 milliardga baholangan, uni tamomlash sanasi esa 2020 yil 31 dekabrga ko‘rsatilgan. Moliyalashtirish manbasi to‘liq davlat budjeti hisobidan.
2021 yil 29 mart kuni tomonlar shartnoma qiymatini 431,52 milliard so‘mga oshirishni ko‘zda tutuvchi qo‘shimcha shartnoma tuzgan. Mablag‘ning 113,6 mlrd so‘mi 2019-2020 yillarda to‘lab berilgan.
2GIS servisi xaritasiga ko‘ra, Sharof Rashidov shohko‘chasidagi 5-uy –Mustaqillik maydonidagi «Ezgulik» arkasi va Vazirlar Mahkamasi orasida joylashgan 14 qavatli ma'muriy bino. Ilgari bu yerda Moliya, Xalq ta'limi va Madaniyat vazirliklari joylashgandi.
Hozirda bu binoda qaysi idora yoki vazirlik joylashgani noma'lum. Davlat xaridlari portalida joylashtirilgan hujjatlarga ko‘ra, rekonstruksiyani loyihalashtirish uchun Vazirlar Mahkamasining 2019 yil 13 apreldagi «O‘zbekiston Respublikasi Prezidentining Davlat xavfsizligi xizmati moddiy-texnik bazasini yaxshilash to‘g‘risida»gi 307-qarori asos qilib keltirilgan (hujjat ochiq manbalarda berilmagan).
«Trest-12» – O‘zbekistondagi eng yirik qurilish kompaniyalaridan biri
Korxonalar va tashkilotlarning yagona davlat reyestri ma'lumotlariga ko‘ra, «Trest-12» kompaniyasi 1994 yil 7 dekabrda ro‘yxatga olingan. Asosiy faoliyat turi – noturar binolar qurish. Rahbar sifatida Faxriddin Nazirov ko‘rsatilgan. Aksiyadorlar orasida Toshkent hokimiyati (51,1 foiz), Muazzam Saidaxmatovna Zokirova (19,1 foiz), Jasur Botirovich Zokirov (14,1 foiz), Muhayyo Oktyabrevna Zokirova (13,1 foiz) va yana 12 nafar jismoniy shaxs ko‘rsatilgan (2,6 foiz).
«Gazeta.uz» ma'lumotiga ko‘ra, Jasur Zokirov va Muhayyo Zokirova – qurilish vaziri Botir Zokirovning o‘g‘li va turmush o‘rtog‘i hisoblanadi. Avvalroq uning o‘zi ham 2019 yil iyulida (o‘sha paytda u qurilish vazirining birinchi o‘rinbosari lavozimida edi, 1996-2011 yillarda esa «Trest-12» boshqaruvi raisi bo‘lgan) «Trest-12» aksiyadorlaridan biri bo‘lgan.
Kompaniya tarixi «Boshtoshkentqurilish» buyrug‘iga muvofiq, jamoat ishlarini bajarish uchun 12-trest tashkil etilgan 1979 yilga borib taqaladi. Trest 1994 yilda «Tashkenstroy» DAQK «Trest-12» AJga aylantirilgan, 2000 yilda esa mustaqil yuridik shaxs bo‘lgan. 2017 yilda MChJga, 2018 yilda esa yana AJga aylangan.
2018 yil iyulda Spot bergan ma'lumotga ko‘ra, «Trest-12» tarkibiga jami 3275 nafar ishchisi bo‘lgan 10ta ixtisoslashtirilgan strukturaviy bo‘linma kirgan, oxirgi 10 yilda bajarilgan ishlar hajmi 800 mln dollardan ortiq.
«Trest-12» kompaniyasi turli yillarda Vazirlar Mahkamasi binosi rekonstruksiyasi (2001), Senat ma'muriy binosi (2004), Moliya vazirligi binosi (2005), Singapur menejmentni rivojlantirish instituti (2008) binolari, «Bunyodkor» stadioni (2012), HYATT Regency mehmonxonasi (2016) va boshqa binolarni (2017 yilgacha bo‘lgan loyihalar kompaniya saytida berilgan) qurish bilan shug‘ullangan. Kompaniya jami 225dan ortiq loyihani amalga oshirgani xabar qilingan.
Oxirgi loyihalar orasida kompaniya tendersiz bosh pudratchi etib belgilangan Islom sivilizatsiyasi markazi qurilishini ko‘rsatish mumkin. 2020 yil oktabr holatiga, loyiha qiymati 988,2 mlrd so‘m deb baholangan (jumladan, tadbirkor Alisher Usmonov hisobidan ham moliyalashtirilgan).
2020 yilda «Trest-12» xususiylashtirishdan oldin tayyorlash va investitsiyaviy jozibadorligini oshirish orqali ommaviy savdolarda to‘liqligicha davlat aksiya paketlari (ulushlari) sotiladigan korxonalar ro‘yxatiga kiritilgan.
