G‘azodagi kasalxonaga aviazarba oqibatida 800dan ziyod tinch aholi halok bo‘lgani xabar qilinmoqda

Falastin prezidenti Mahmud Abbos shifoxonada halok bo‘lgan qurbonlar xotirasiga davlatda uch kunlik motam e’lon qildi.

G‘azo bo‘lgasini nazorat qiluvchi HAMAS harakati hujumda Isroilni aybladi. Buni rad etgan Isroil tomoni shifoxonaga Falastinning “Islomiy jihod” guruhi tomonidan uchirilgan va trayektoriyasidan adashgan raketa qulab tushganini ta’kidladi.

Harbiy tahlilchilar va ekspertlar G‘azodagi kasalxonaga Amerikada ishlab chiqarilgan JDAM raketasi bilan zarba berilganini aniqlashgan. Bu haqda turli davlatlardan o‘nlab yirik ekspertlar bayonot bergan. Amerikaning JDAM raketasining o‘ziga xos sifati uning tovushi hisoblanadi. Raketa juda katta tezlikda uchgani va ma’lum bir shaklga ega bo‘lgani uchun uning tovushini boshqa raketalardan osongina farqlash mumkin.

Rossiya va BAA G‘azodagi shifoxonaga berilgan zarba tufayli 18 oktyabr kuni BMT Xavfsizlik Kengashining shoshilinch yig‘ilishini o‘tkazishni so‘rashdi.

Turkiya prezidenti Rajab Toyyib Erdo‘g‘an birinchilardan bo‘lib G‘azodagi hospitalga aviazarbani qoralab chiqdi va jahon hamjamiyatini Falastin anklavidagi «misli ko‘rilmagan shafqatsizlik»ni to‘xtatishga chaqirdi.

İçerisinde kadınların, çocukların, masum sivillerin olduğu bir hastaneyi vurmak, İsrail’in en temel insani değerlerden yoksun saldırılarının son örneğidir.

Gazze’de yaşanan ve tarihte benzeri olmayan bu vahşeti durdurmak için tüm insanlığı harekete geçmeye davet ediyorum.

— Recep Tayyip Erdoğan (@RTErdogan) October 17, 2023

«Ayollar, bolalar va hech narsada aybsiz bo‘lgan tinch aholi vakillari bo‘lgan kasalxonaga zarba berish — bu Isroilning elementar insoniy qadriyatlardan xoli bo‘lgan hujumlarining namunasidir.

Men butun insoniyatni G‘azo sektoridagi bu misli ko‘rilmagan shafqatsizlikni to‘xtatishga chaqiraman», — deb yozdi Erdo‘g‘an X (sobiq Twitter) ijtimoiy tarmog‘ida.

Birin-ketin boshqa davlatlarning ushbu mash’um zarbaga nisbatan munosabatlari yangray boshladi.

Pentagon G‘azo sektoridagi hospitalga Isroil aviazarbasi to‘g‘risidagi xabarlarga munosabat bildirdirib, «AQSh Isroilni «urush qonunlari»ga rioya qilishga chaqiradi», deya bayonot berdi.

«Biz Isroil tomonidan G‘azo sektoridagi Al-Ahli baptistlar hospitalining bombardimon qilinishini keskin qoralaymiz», — deya bayonot berdi Misr tashqi ishlar vazirligi.

Misr muftiysi Shavqi Allam Isroilning G‘azodagi Al-Ahliy baptistlar kasalxonasiga hujumini qoraladi va dunyoni «Isroilning falastinliklarga qarshi jinoyatlarini to‘xtatish uchun aralashish»ga chorladi.

Saudiya Arabistoni Tashqi ishlar vazirligi «G‘azodagi shifoxonani portlatish — og‘ir jinoyatdir», dedi.

Eron Tashqi ishlar vazirligi vakili «G‘azo sektoridagi kasalxonaga hujum shafqatsizlik bilan amalga oshirilgan jinoyat bo‘lib, sionistik rejim urush chog‘ida asosiy xalqaro prinsiplarga rioya qilmasligini namoyish etadi», deya bayonot berdi.

Iordaniya qiroli G‘azodagi kasalxona portlashini «qirg‘in» va «harbiy jinoyat» deb atadi.

Bundan tashqari, Iordaniya Tashqi ishlar vazirligi 18 oktyabr kuni AQSh prezidenti Jo Bayden bilan o‘tadigan oliy darajadagi uchrashuvni bekor qildi.

«Biz Ammonda o‘tkazishi rejalashtirilgan to‘rttomonlama sammitni ertaga o‘tkazmaslikka qaror qildik», — deyiladi Iordaniya TIV bayonotida.

Jo Bayden bilan uchrashuvda Iordaniya prezidenti Ayman Safadiy, Misr prezidenti Abdulfattoh as-Sisiy, Falastin muxtoriyati raisi Abu Mazen ishtirok etishi ko‘zlanayotgan edi.

Jahon sog‘liqni saqlash tashkiloti ham G‘azo sektoridagi kasalxonaga hujumni qat’iy qoraladi. «Tinch aholi va tibbiyot muassasalarini himoyalashning zudtar choralarini ko‘rishga chaqiramiz», deya chiqish qildi JSST bosh direktori Tedros Adanom Gebreisus.

Yevropa Ittifoqi tashqi siyosiy xizmati rahbari Jozep Borrel G‘azodagi hospitalga zarbani «dahshatli jinoyat» deb atadi va «aybdorlarni jazoga tortish»ga chaqirdi.

«G‘azodagi kasalxonadan kelayotgan yangiliklar so‘nggi kunlarda ko‘z o‘ngimizda sodir bo‘layotgan fojiani yanada dahshatli tus oldirmoqda. Yana aybsiz tinch aholi katta tovon to‘lamoqda. Bu dahshatli jinoyatning aybdorlari bitta-bitta aniqlanib, javobgarlikka tortilishi kerak», — deb yozgan Borrel X ijtimoiy tarmog‘ida.

Mudhish fojia turli davlatlarda yashayotgan musulmonlarni junbishga keltirdi. Ular Isroilni qoralash uchun ko‘chalarga namoyishga chiqishdi. Jumladan, Iordaniya poytaxti Ammon shahrida Isroil elchixonasiga o‘t qo‘yilgani aytilmoqda. Istanbul shahridagi Isroil konsulligi binosi oldida ham ko‘p ming kishilik norozilik namoyishi o‘tkazildi.

G‘azodagi fojia tufayli Eron, Iroq, Livan va bir qator arab davlatlarida 18 oktyabr motam kuni deb e’lon qilindi.