Qoraqalpog‘istonda madaniyat va san'atni rivojlantirish dasturi tasdiqlandi

Vazirlar Mahkamasining “Qoraqalpog‘iston Respublikasida madaniyat va san'at sohasini yanada rivojlantirish chora-tadbirlari to‘g‘risida”gi qarori qabul qilindi.

Madaniyat va san'at sohasini hamda madaniy turizmni rivojlantirish maqsadida “2021-2024 yillarda Qoraqalpog‘iston Respublikasida madaniyat va san'at sohasini yanada rivojlantirish bo‘yicha chora-tadbirlar” Dasturi tasdiqlandi.

Dastur quyidagilarni nazarda tutadi:

• ta'lim muassasalari faoliyati samaradorligini oshirish;
• muzeylar, teatrlar va ijodiy jamoalar faoliyatini yanada rivojlantirish;
• madaniyat markazlarining moddiy-texnik bazasini mustahkamlash;
• “Qoraqalpoqfilm” kinostudiyasi moddiy-texnik bazasini mustahkamlash va faoliyatini rivojlantirish;
• madaniy-ma'rifiy, targ‘ibot tadbirlarini tashkil etish va o‘tkazish.

Shuningdek, qaror bilan Madaniyat vazirligi muassisligida “Qoraqalpog‘iston san'at saroyi” davlat muassasasini tashkil etish nazarda tutilgan. 
 
Quyidagilar San'at saroyi faoliyatini moliyalashtirish manbalari etib belgilandi:

• Qoraqalpog‘iston Respublikasi respublika budjetidan ajratiladigan mablag‘lar;
• Madaniyat vazirligining budjetdan tashqari mablag‘lari;
• xo‘jalik faoliyatidan va shartnoma asosida ko‘rsatilgan xizmatlardan tushadigan mablag‘lar;
• xalqaro moliya tashkilotlari va xorijiy tashkilotlarning grantlari;
• jismoniy va yuridik shaxslarning homiylik xayriyalari;
• qonunchilik hujjatlari bilan taqiqlanmagan boshqa manbalar.