O‘zbekistonda paxta dalalari maydoni qisqartiriladi

2017 yil 4 oktabr kuni Toshkent shahrida Oliy Majlis Senatining 12-yalpi majlisi o‘tkazildi. Unda majburiy mehnatga yo‘l qo‘ymaslik yuzasidan «Fuqarolarning kafolatlangan mehnat huquqlarini ta'minlashga doir chora-tadbirlarni kuchaytirish to‘g‘risida»gi qarori loyihasi muhokama qilindi. O‘zbekiston Qishloq va suv xo‘jaligi vaziri o‘rinbosari, qishloq xo‘jaligi ilmiy-ishlab chiqarish markazi bosh direktori Shuhrat Teshayev senatorlarga bu borada amalga oshirilayotgan ishlar yuzasidan axborot berdi.

«2016 yil hosilidan boshlab kelgusi 5 yil davomida paxta maydonlarini 185 ming gektar yoki 14,5 foizga qisqartirish ko‘zda tutilgan. Ushbu paxtadan bo‘shagan maydonlarga, sabzavot, poliz, yem-xashak moyli va dukkakli ekinlar va kartoshka ekish hamda intensiv bog‘lar va tokzorlar barpo etish rejalashtirilgan. Natijada 2020 yilga kelib, meva-sabzavot mahsulotlari, uzum va poliz ekinlarini yetishtirishni kamida 2,3 baravarga oshirishga erishiladi. 3 yil mobaynida qishloq xo‘jaligi mahsulotlarini eksport qilish 3 baravar oshishi ta'minlanadi», — degan vazir o‘rinbosari.