Prezident Shavkat Mirziyoyev Samarqand viloyati markazi Gulobod qo‘rg‘oniga ko‘chirilishini ma'lum qildi.
«Samarqand shahrini 1 million aholi yashaydigan yirik shaharga aylantirish uchun Samarqand, Past Darg‘om, Tayloq va Oqdaryo tumanlari hududidan 18 ming gektar yer maydonini qo‘shib berish va viloyat ma'muriy markazini Gulobod qo‘rg‘oniga ko‘chirish bo‘yicha taklifni qo‘llab-quvvatlayman.
Ana shunday yo‘l tutmasak, Samarqandda turizmni ko‘ngildagidek rivojlantira olmaymiz. Shahar ichidan barcha davlat idoralarini ko‘chiramiz. Ma'muriy markaz Gulobod qo‘rg‘onida bo‘ladi. Shahar ichida faqat turistlar bemalol aylanib yuradigan bo‘lishadi.
Ramatov, Zakirov, Turdimov chet ellik loyihachilarni jalb qilgan holda, yil yakuniga qadar Samarqand shahrining kengayishini hisobga olib, bosh reja loyihasini ishlab chiqadi.
Shaharda boshqaruv tizimini yaxshilash maqsadida, kelgusi yildan Samarqand shahri tarkibida 5ta (So‘g‘diyona, Siyob, Bog‘ishamol, Maroqand va Qorasuv) yangi tuman tashkil etiladi. Men hali bu masalani yana yaxshilab o‘ylab ko‘rib, batafsil o‘rganib, yakuniy nuqta qo‘yaman.
Buning uchun chet el loyiha institutlarini jalb qilamiz. Shoshilmasdan, sinchiklab o‘rganib, deputatlarga, xalqimizga taqdim qilib, shundan keyin 2022 yilda ishni boshlaymiz. Yangicha yashayapmizmi, yangicha usulda ishlashni ham o‘rganishimiz kerak, tizim ham o‘zgarishi kerak», – deya prezidentning so‘zlaridan iqtibos keltirmoqda Kun.uz muxbiri.
