O‘zbekistonda talaba va o‘quvchilar qachondan qishki ta’tilga chiqishi ma’lum qilindi.
O‘zbekistonda talaba va o‘quvchilar (litsey va kollejlar o‘quvchilari) uchun qishki ta’til 28 dekabrdan boshlanadi. Bu haqda Oliy va o‘rta maxsus ta’lim vazirligi xabar qildi.
Qayd etilishicha, ta’til 2022 yilning 10 yanvarigacha davom etadi. Dars jarayonlari 11 yanvardan boshlanadi.
Bundan avvalroq Xalq ta’limi vazirligi maktab o‘quvchilari uchun qishki ta’til 28 dekabrdan boshlanishi haqida xabar qilgandi. Ta’til 14 kalendar kuni, ya’ni 10 yanvargacha davom etadi.
Eslatib o‘tamiz, Uzbekistan Airways talabalarga 50 foizlik chegirma e’lon qilgan. Ushbu chegirma 28 dekabrdan 10 yanvargacha amal qilishi ko‘zda tutilgan.
Shuningdek, «O‘zbekiston temir yo‘llari» 31 dekabrdan 2022 yilning 4 yanvargacha oliy o‘quv yurtlarining talabalari, maktab o‘quvchilari, kollej va litsey talabalari, IIV, MV, DXX, DS, DB maxsus ta’lim muassasalari talabalariga chiptaning tarif qismidan 15 foiz miqdorida chegirma beradi.
