Oliy sud Bekobod prokurorini dog‘da qoldirdi. Tadbirkor ko‘rgan zararni endi kim qoplaydi?

Bekobod tumanida yashovchi G‘aybulla Xudoyberdiyevning davlat belgilagan shartlar asosida, onlayn auksionda qatnashib, savdo do‘koni qurish uchun 2 sotix yer sotib olgani atrofdagilarga yoqmadi. Mulk huquqi shubhali bo‘lgan «mulkdor»lar darrov tuman prokuroriga chopib borishdi.

Prokuror esa masalaning mohiyatini chuqurroq o‘rganib ham o‘tirmasdan, andishaning otini qo‘rqoq qo‘ydi chog‘i, tadbirkor qonuniy yo‘l bilan sotib olgan yer uchastkasini davlat zaxirasiga qaytarishga kirishdi. Bu ishda unga Bekobod tuman ma'muriy sudi «ko‘maklashib» yubordi. Hammasi xamirdan qil sug‘urgandek, oson bitdi. Hokimning yerni auksionga chiqarish to‘g‘risidagi qarori bekor bo‘ldi, yer esa zaxiraga qaytarildi. Bu safar voqeaning tafsilotlariga batafsil to‘xtalmaymiz, zero bu haqda har tomonlama to‘la bayon etilgan maqolamizni o‘qigan bo‘lsangiz kerak.

Baxsizlikni qarangki, davlatdan aldanib qolmasligiga ishongan sodda tadbirkor bu vaqtga kelib bor-budini sarflab, yer uchastkasi ustida bino qurib qo‘ygan edi. Oliy sudda ishi ko‘rilayotganini aytib, buzishni biroz kechiktirib turishni iltimos qilishiga qaramay, bino bir zumda yer bilan yakson qilindi.

Darhaqiqat, G‘aybullaning adolat yo‘lidagi kurashlari Oliy sudda hali davom etib turgan bir vaqtda u bunyod etgan (qurilishi tugallanmagan) savdo do‘koni binosi MIB tomonidan ayovsiz tarzda buzib tashlandi. Bu buzishning ortida tanqiddan o‘zini haqoratlangandek his qilgan tuman prokurori turgan bo‘lsa ne ajab...

Kun.uz’da maqola e'lon qilingach, ushbu holat Toshkent viloyat prokuraturasi tomonidan o‘rganib chiqilib, rasmiy munosabat bildirilgandi. Eng qizig‘i, viloyat prokurori S.I.Samadovning imzosi bilan yo‘llangan bu munosabatda Kun.uz tahririyati noxolislikda ayblandi.

Bundan tashqari, viloyat prokuraturasi ham xuddi tuman prokuraturasi kabi zo‘r berib, I.Suvonqulovni mulkdor va ish bo‘yicha manfaatdor ekanini, bu qurilish uning manfaatlariga ziyon yetkazayotganini isbotlashga urindi.

Kun.uz haq bo‘lib chiqdi. Bekobod tuman prokurorning “saviyasi” Oliy sudda ayon bo‘ldi

Tadbirkor G‘aybulla Xudoyberdiyev ma'muriy sudning tuman va viloyat instansiyalari qarorlaridan norozi bo‘lib, Oliy sudga nazorat tartibida shikoyat kiritgan edi. Mazkur ish joriy yil 3 sentabr kuni Oliy sudning Ma'muriy ishlar bo‘yicha sudlov hay'atida ko‘rib chiqildi.

Hay'at qarorida, jumladan shunday so‘zlar bitiladi:

«... Bekobod tuman prokuraturasi I.Suvonqulovning manfaatida bayon qilingan ariza bilan sudga murojaat qilgan.

Quyi sud majlislari va nazorat instansiyasi sud majlisida so‘ralgan I.Suvonqulov fuqaro G‘.Xudoyberdiyevga ajratilgan yer uchastkasining orqasida unga tegishli bo‘lgan savdo do‘koni mavjudligini, shuning uchun uning manfaatlari buzilayotganini bayon qilgan.

Ish hujjatlariga qaraganda, I.Suvonqulovning foydalanishida bo‘lgan savdo do‘koni o‘zboshimchalik bilan qurilgan imorat hisoblanadi, mazkur savdo do‘konining biron bir yuridik hujjati mavjud emas, ushbu do‘konga nisbatan xech kimning egalik huquqi belgilanmagan.

Fuqaro I.Suvonqulov o‘zboshimchalik bilan qurilgan va noqonuniy bo‘lgan qurilmada faoliyat olib borayotgan bo‘lsa-da, tuman prokuraturasi uning vujudga kelmagan va amalda mavjud bo‘lmagan manfaatini ko‘zlab, ariza bilan sudga murojaat qilgan (bu haqida Kun.uz o‘z surishtiruvida batafsil to‘xtalgan edi – tahr.).

Quyi sudlar tomonidan tuman prokuraturasining arizasini qanoatlantirishga asos sifatida ko‘rsatilgan barcha holatlar fuqaro I.Suvonqulovning vujudga kelmagan va amalda mavjud bo‘lmagan manfaatini va huquqlarini tiklash uchun asos bo‘la olmaydi.

Agarda tuman prokuraturasi aynan ushbu vajlarni ko‘rsatib, davlat manfaatida sudga murojaat qilganida, mazkur vajlar tekshirilishi lozim bo‘lar edi, lekin o‘zi hech qanday huquqqa ega bo‘lmagan fuqaroning manfaatini ko‘zlab keltirilgan arizada emas.

Shunday qilib, Oliy sud sudlov hay'ati o‘z qarori bilan Bekobod tuman ma'muriy sudi va Toshkent viloyat ma'muriy sudi apellyatsiya instansiyasining tegishli qarorlarini bekor qilib, Bekobod tuman prokurorining shikoyat arizasini rad qilish to‘g‘risida yangi hal qiluv qarori qabul qildi.

Afsuski, sudning bu qarori tadbirkorning barcha muammolariga barham bera olmaydi, chunki u qariyb 200 mln sarflab bunyod etgan bino buzib tashlangan.

Mamlakat ichida millionlab yoshlar ishsiz, yana allaqanchasi ish yo‘qligidan o‘z rizqini o‘zga yurtlardan terib, ming azob-uqubatlarda yurgan bir vaqtda, yurtda tadbirkorlik qilib, 4-5 kishini ishli qilaman deb yurgan odam shaxsan prokuror tomonidan sindirilsa... Shuning o‘zi yurt kelajagiga eng katta xavf emasmi?

Prezident farmoni bilan tuman (shahar) ma'muriy sudlari tugatilayotganidan xabaringiz bo‘lsa kerak. Davlat rahbari va yuqori idoralarning bunday qarorga kelishiga shu sud sudyalarining mahalliy hokim-u prokurorlarning chizgan chizig‘idan chiqa olmay qolgani ham sabab bo‘lgan bo‘lsa ne ajab...

Voqealar rivojini kuzata turib, kelgusi jurnalistik materiallarimizda foydalanishda asqotib qolar, deya Toshkent viloyat prokuroriga ayrim savollar bilan murojaat qilishga jazm etdik.

Bu boradagi jurnalistik surishtiruvlar davom ettiriladi.

Tolib Rahmatov,
Kun.uz muxbiri