O‘zbekiston | 22:41 / 28.02.2023
28403
2 daqiqa o‘qiladi

Tezlik barcha aholi punktlarida emas, faqat asosiy shaharlarda pasaytiriladigan bo‘ldi

Tasdiqlangan davlat dasturiga asosan, 2023 yil 1 apreldan e’tiboran Toshkent va Nukus shaharlarida hamda viloyatlar va tumanlarning markazlarida maksimal tezlik 70 km/soatdan 60 km/soatga tushiriladi. Dastur loyihasida tezlikni barcha aholi punktlarida 60 ga tushirish taklif etilgandi.

Foto: Getty Images

O‘zbekistonda 2023 yilgi davlat dasturi tasdiqlandi.

Unda yo‘l harakati xavfsizligini sohasini “shahar avtomobillar emas, piyodalar uchun” g‘oyasi asosida isloh qilish ko‘zda tutilgan.

Shu maqsadda 2023 yil 1 apreldan boshlab Toshkent va Nukus shaharlarida hamda viloyatlar va tumanlarning markazlarida transport vositalari harakatlanishining eng yuqori tezligi soatiga 70 kilometrdan 60 kilometrgacha tushiriladi.

Eslatib o‘tamiz, davlat dasturi loyihasida 2023 yil 1 iyundan boshlab barcha aholi punktlarida maksimal tezlikni 70 km/soatdan 60 km/soatga tushirish taklif etilgan edi. Yakunda yangi cheklov faqat Toshkent, Nukus hamda viloyat va tuman markazlariga taalluqli bo‘lishi va 1 apreldan kuchga kirishi belgilandi.

Tasdiqlangan davlat dasturiga ko‘ra, 2023 yil 1 dekabrdan boshlab transport vositasining egasiga transport vositasini boshqarish huquqi o‘tkazilgan shaxs bilan birgalikda tegishli huquqni belgilovchi hujjatni (ishonchnoma va boshqalar) taqdim etgan holda, DYHXX organlarini transport vositasini boshqarish huquqini o‘tkazgani haqida xabardor qilish huquqi beriladi.

Bunda, xabarnoma olingan kundan boshlab vakolatli organ YHXXning Yagona avtomatlashtirilgan axborot-tahlil tizimiga tegishli o‘zgartirishlar kiritadi. Natijada bu transport vositasida sodir etilgan qoidabuzarliklar uchun jarimalar boshqarish huquqi o‘tkazilgan shaxs nomiga yoziladi.

Mavzuga oid