O‘zbekiston futbol assotsiatsiyasi va Adidas kompaniyasi o‘rtasida tuzilgan 2 yillik kelishuvga binoan, milliy terma jamoaga 2019 yilgi Osiyo chempionati uchun yangi dizayndagi liboslar tayyorlab beriladi. Bu haqda Milliy Olimpiya qo‘mitasi prezidenti, O‘zbekiston futbol assotsiatsiyasi vitse-prezidenti Umid Ahmadjonov «Kun.uz»ga ma'lum qildi.
«Hozirgi liboslar vaqtinchalikka. Tayyorini oldik. Kelishuv bo‘yicha Adidas yangi dizayndagi liboslarni tayyorlab beradi», degan Ahmadjonov.
Ma'lumot uchun, O‘zbekiston futbol terma jamoalari shu vaqtga qadar Joma kompaniyasi liboslarida to‘p surib kelardi.
Bundan avvalroq O‘zbekiston futbol assotsiatsiyasi Germaniyaning Adidas kompaniyasi bilan 2 yillik shartnoma imzolagani haqida xabar berilib, terma jamoa futbolchilari uchun yangi dizayndagi liboslar namoyish qilingandi.
O‘FA Nike va Adidas kompaniyalaridan ikkinchisini tanlagan.
Adidas liboslari Germaniya texnologiyalari asosida tikiladi, oyoq kiyimlar esa Italiya texnologiyalarida vositasida tayyorlanib, ular ham Yevropa standartiga to‘la javob beradi.
Ertaga, 6 sentabr kuni Suriyaga qarshi o‘tkaziladigan o‘yinda O‘zbekiston terma jamoasi ilk marta Adidas liboslarida maydonda harakat qilishadi.
Ma'lumot uchun, bunga qadar O‘zbekiston terma jamoalari Ispaniyaning Joma firmasi tomonidan taqdim etilgan liboslarda maydonga tushib kelishardi.
