O‘zbekistondagi maktabgacha ta'lim tashkilotlarida 3-7 yoshli bolalar guruhlarida tarbiyalanuvchilar soni 25 nafardan 30 nafarga oshiriladi.
«Bola siqilib qolmaydimi, deb ota-onalar aytishi mumkin. Yo‘q, biz bolalar yotoqxonasidagi mebel jihozlarni yengil konstruksiyali mebellarga almashtirish orqali joylarni kengaytiramiz», – deya izoh berdi Maktabgacha ta'lim vaziri o‘rinbosari Maqsudjon Yo‘ldoshev 29 yanvar kuni XPK sessiyasida.
Mazkur o‘zgarish 2019 yil dekabrida qabul qilingan «Maktabgacha ta'lim va tarbiya to‘g‘risida»gi qonunda belgilangan. Qonun 2020 yil 16 iyundan boshlab kuchga kiradi.
Unga ko‘ra, umumiy turdagi davlat maktabgacha ta'lim tashkilotlarida guruhlar tegishli ravishda quyidagi miqdorda to‘ldiriladi:
- 3 yoshdan 7 yoshgacha bo‘lgan bolalar guruhlarida — ko‘pi bilan 30 nafar bola;
- bolalar qisqa vaqt bo‘ladigan guruhlarda — ko‘pi bilan 30 nafar bola;
- turli yoshdagilar guruhlarida — ko‘pi bilan 25 nafar bola;
- bolalar kecha-yu kunduz bo‘ladigan guruhlarda — ko‘pi bilan 10 nafar bola.
Prezident topshirig‘i qanday bajariladi?
2019 yili O‘zbekistonda maktabgacha ta'lim qamrovi 38 foizdan 52 foizga ko‘tarilgan. Prezident Shavkat Mirziyoyev shu yil oxirigacha bu ko‘rsatkichni 60 foizga yetkazish vazifasi qo‘ygan.
Kun.uz muxbirining xabar berishicha, Maqsudjon Yo‘ldoshev bunga qanday erilishi bo‘yicha ham tushuntirish bergan.
«Bunga qanday erishamiz? Bugungi kunda 2,7 mln bolaning 1,4 millioni, ya'ni 52 foizi bog‘chaga qatnayotgan bo‘lsa, biz 240 mingta yangi o‘rin yaratishimiz kerak. Nodavlat sektorga ko‘plab imtiyozlar joriy etilgani tizimning o‘z-o‘zidan barqaror rivojlanishiga olib keldi. Bu yilni o‘zida 2 mingta oilaviy maktabgacha ta'lim tashkiloti tashkil etishni rejalashtirganmiz. Bu bilan 50 mingta yangi o‘rin yaratiladi.
Qolaversa, davlat-xususiy sherikchiligi asosida ochiladigan 400dan ortiq MTTda 40 ming yangi o‘rin yaratiladi. Investitsiya dasturiga asosan esa 418ta muassasa rekonstruksiya qilinib, 19ta yangi bog‘chalar tashkil etiladi. Rekonstruksiya jarayonida ham biz muassasaning holatidan kelib chiqib, uni kengaytirishimiz natijasida 27 ming yangi o‘rinlarni yaratamiz.
Bu uchta yo‘nalishda o‘rtacha 130 mingta o‘rin tashkil etilsa, qolgan qismi bog‘chalardagi guruhlarda tarbiyalanuvchilar sonini oshirish hisobidan bajariladi. Yaqinda qonun qabul qilindi: shu paytgacha bog‘chada bitta guruhda 25 bola bo‘lib kelmoqda, endi yildan boshlab buni 30 nafarga oshirishni rejalashtirganmiz», – dedi Maktabgacha ta'lim vaziri o‘rinbosari.
