Chet eldan kirib kelganlar («yashil» aviareyslarda kelganlardan tashqari) 14 kun karantinga olinadi. Fuqaro o‘z xohishi bilan profilaktik dorilarni qabul qilsa, bu muddat 7 kunga qisqaradi.
Foto: Namangan viloyat hokimligi axborot xizmati
Bu haqda Respublika maxsus komissiyasining 12 avgust kuni e'lon qilingan 43-son bayonida aytib o‘tilgan.
Unga ko‘ra, Jahon sog‘liqni saqlash tashkilotining tavsiyalarini inobatga olib, shuningdek, mamlakatdagi epidemiologik vaziyatdan kelib chiqqan holda, O‘zbekistonga xorijiy davlatlardan kirib kelayotgan shaxslarni karantinga olishning quyidagilarni nazarda tutuvchi tartibi joriy etildi:
- xorijiy davlatlardan kirib kelayotgan shaxslarni karantinda saqlash muddati 14 kun etib belgilanadi;
- karantin muddatini shaxsning xohishiga ko‘ra yo karantin markazida, yoki mehmonxonada o‘tkazish tartibi saqlab qolinadi;
- karantin muddati shaxsning davolash-profilaktika chora-tadbirlarini amalga oshirishga roziligiga ko‘ra, karantinda saqlash muddati vrachlar kuzatuvi ostida davolash-profilaktika chora-tadbirlarini amalga oshirgan (Sog‘liqni saqlash vazirligi tomonidan tavsiya etilgan dori vositalarini qabul qilgan) holda 7 kun etib belgilanadi (bunda 7 kunlik karantindan so‘ng test natijasi manfiy bo‘lganda shaxs karantin markazidan chiqariladi).
