Таркибида 2 та шаҳар, 13 та туман ва 1046 та аҳоли яшаш пунктлари мавжуд бўлган Қашқадарё вилоятида 46 фоиз аҳоли ташима йўллар орқали сув истеъмол қилади. Бу ҳақда Қашқадарё вилояти ҳокими Зафар Рўзиев Сенатдаги маърузасида билдирди.
«Вилоят аҳолисининг 54 фоизи марказлашган ичимлик суви билан таъминланган бўлиб, қолган 46 фоизи ташима йўли орқали таъминланиб келинмоқда.
Аҳолини ичимлик суви билан таъминлаш бизнинг асосий муаммоларимиздан бири», — дейди Рўзиев.
Вилоят ҳокимининг таъкидлашича, бу борада Шавкат Мирзиёевнинг 2018 йил 28-30 январь кунлари вилоятга ташрифи давомида тегишли топшириқ ва кўрсатмалар берилган эди.
«Мазкур муаммони ҳал этиш мақсадида 2018 йилда 45,8 млрд. сўм маблағ жалб этилиб, 46,4 км. сув тармоқлари янгидан қурилди, 78,5 км. сув тармоғи реконструкция қилинди», — деб қўшимча қилган ҳоким.
Рўзиевнинг айтишича, 2018 йилда секторлар раҳбарлари бошчилик қиладиган ишчи гуруҳлар 608 339та хонадонга кириб, аҳолининг 16 887та муаммосини аниқлаган.
Таъкидланишича, аниқланган муаммоларнинг асосий қисмини ишга жойлаштириш, табиий газ, ичимлик суви, электр энергияси таъминоти ва соғлиқни сақлаш соҳасидаги масалалар ташкил этган.
