20 yoshli o‘zbekistonlik Rossiyadagi qurilishda halok bo‘ldi

Rossiyaning Leningrad oblasti, Kudrovo shahridagi qurilish maydonchasida ikki nafar mehnat migranti halok bo‘ldi. Ulardan biri o‘zbekistonlik.

Foto: RIA Novosti

Fojia 21 fevral kuni soat 20:00 atrofida sodir bo‘lgan. Bu haqda Fontanka xabar berdi.

Qurilish maydonchasi qo‘riqchisi obektni ko‘zdan kechirayotganida shovqin-suronni eshitgan. So‘ngra yerga qulab tushgan havozani ko‘rib qolgan. Uning ichida bo‘lgan 20 yoshli O‘zbekiston fuqarosi va Tojikistonda tug‘ilgan 18 yoshli yigit halok bo‘lgan.

Leningrad oblasti prokuraturasi mehnatni muhofaza qilish qonunchiligiga rioya etilishi bo‘yicha tekshiruv boshlagan.

«Tekshiruv davomida hodisaning barcha holatlariga baho beriladi, agar asoslar mavjud bo‘lsa, prokuror tomonidan javob choralari ko‘riladi», deyiladi nazorat organi matbuot xizmati xabarida.