Afg‘oniston prezidenti kelgusi hafta O‘zbekistonga tashrif buyuradi

26-27 mart kunlari Toshkentda Afg‘oniston muammosiga bag‘ishlangan «Tinchlik jarayoni, xavfsizlik sohasida hamkorlik va mintaqaviy o‘zaro aloqalar» mavzusida konferensiya bo‘lib o‘tadi. Tadbirda 20dan ortiq mamlakat va xalqaro tashkilotlar delegatsiyalari ishtirok etadi.

Xususan, Toshkentga Afg‘oniston prezidenti Muhammad Ashraf G‘ani, BMTning Afg‘onistonga ko‘mak ko‘rsatish bo‘yicha missiyasi rahbari Tadamiti Yamamoto, Yevropa Ittifoqining tashqi ishlar va xavfsizlik siyosati bo‘yicha Oliy komissari Federika Mogerini keladi, deya xabar berishgan davlat rahbari matbuot xizmatidan.

AQSh davlat kotibi o‘rinbosari Tomas Shennon, Rossiya tashqi ishlar vaziri Sergey Lavrov, Eron tashqi ishlar vaziri Javod Zarif, Pokiston tashqi ishlar vaziri Muhammad Asifning ishtiroki tasdiqlandi.

Shuningdek, Xitoy, Qozog‘iston, Qirg‘iziston, Tojikiston, Turkmaniston, Hindiston, Yaponiya, Turkiya, Buyuk Britaniya, Germaniya, Italiya, Fransiya, Saudiya Arabistoni, Birlashgan Arab Amirliklari delegatsiyalarining ishtirok etishi kutilmoqda.