Prezident 16 iyun kungi videoselektor yig‘ilishida belgilangan me'yordan kam g‘alla olgan fermer va klasterlardan yer qaytarib olinishi haqida gapirdi.
«Bu yil qilingan barcha chora-tadbirlar, o‘z vaqtida yetkazib berilgan o‘g‘it, agrotexnik tadbirlar, qolaversa, ob-havoning qulay kelgani sababli g‘allachilikda mo‘l hosil kutilyapti. Endi iloji boricha g‘allamizni tez yig‘ishtirib olib, bir kun oldin bo‘lsa ham eksport mahsulotlarini eksak, hozirgi iqtisodiyotimizga madad bo‘ladi.
Masalan, Yozyovon tumanidagi «Bahrombek» fermer xo‘jaligi 95 sentner hosil olyapti», degan prezident.
Shuningdek, Termiz, Paxtakor, Sayxunobod tumanlaridagi bir qator fermer xo‘jaliklar ham 80-90 sentnerdan hosil olishni rejalashtirib turgani qayd etib o‘tildi.
Davlat rahbari bu hosildorlik nafaqat oziq-ovqat xavfsizligini ta'minlashga xizmat qilishi, balki fermer ham boy bo‘lishini ta'kidlagan.
«Shu o‘rinda yana bir gapni aytmoqchiman. Mana, Barnoyev o‘tiribdi selektorda. Agar qaysi viloyatda 20 sentnerdan kam hosil olinsa, menga ma'lumotnoma yozib, yerni olasiz. Mana shunday sharoitda mo‘l hosil olmagan fermer yerning egasi emas», deya prezidentning so‘zlarini keltirmoqda Kun.uz muxbiri.
