Фабио Каннаваро — Ўзбекистон миллий жамоасининг янги бош мураббийи бўлади

Италиялик мутахассис Фабио Каннаваро Тимур Кападзе ўрнига Ўзбекистон миллий жамоасининг янги бош мураббийи бўлади. 

Таниқли инсайдер Фабрицио Романо Ўзбекистон томони у билан шахсий шартнома бўйича келишиб олгани, қолган расмий ҳужжатлар яқин 24-48 соат ичида имзоланишини хабар қилди.

Каннаваро таклифни қабул қилган ва унинг тайинлови ҳақида душанба куни эълон қилиниши кутилмоқда.

Шу тариқа, ўз тарихида илк бор мундиалга чиққан Ўзбекистон миллий жамоаси 2026 йил ёзида океанортида бўлиб ўтадиган турнирга хорижлик мутахассис бошчилигида боради.

Бундан олдинроқ бошқа бир инсайдер Николо Скира ЎФА ва мутахассис ўртасидаги музокаралар якуний босқичга етгани, у Ўзбекистон жамоасини 13 октябр куни Уругвайга қарши кечадиган ўртоқлик ўйинига олиб бориши мумкинлигини хабар қилганди.

Унга мураббийлар штабида Чиччо Троизе ёрдамчилик қилиши, Эугенио Албарелла жисмоний тайёргарлик бўйича мураббий сифатида ишлаши айтилган.

Маълумот учун, айни вақтда 52 ёшда бўлган Фабио Каннаваро футболчилик фаолиятида катта ютуқларга эришган. У 2006 йилда Италия миллий жамоаси билан жаҳон чемпионига айланган ва мундиалдаги кучли иштироки учун ўша мавсум якунларига кўра «Олтин тўп»ни қўлга киритганди.

Аммо унинг мураббийликдаги фаолияти бир текис кечмаган. 

У мураббийлик фаолиятини Хитойнинг «Гуанчжоу Эвергранд» клубида бошлаган (2014-2015), кейинроқ Саудия Арабистонининг «Ан-Наср» (2015-2016), Хитойнинг «Тянцзин» (2016-2017), «Гуанжчоу» (2017-2021) клубларида ишлаган, 2019 йилда бир муддат Хитой миллий жамоасини бошқарган, кейин эса Италиянинг «Беневенто» (2022-2023) ҳамда «Удинизе» (2024) клубларини бошқарган.

Унинг сўнгги иш жойи Хорватиянинг «Динамо» Загреб клуби бўлиб қолаётганди, у 2024 йил декабрида хорватлар жамоаси бош мураббийи этиб тайинланган, аммо 2025 йил апрелида қониқарсиз натижалар туфайли истеъфога чиқарилганди.