Мубашшир Аҳмад иши бўйича учинчи суд мажлиси бўлиб ўтди

15 сентябр куни жиноят ишлари бўйича Тошкент шаҳар Учтепа туман судида ўтказилган мажлис қарийб 2 соат давом этди. Очиқ суд мажлисига юзлаб фуқаролар ташриф буюрди. Бу ҳақда Kun.uz мухбири хабар бермоқда.

Иш – судя Бобур Раҳимов раислигида, қораловчи – Учтепа тумани прокурори ўринбосари Эркин Нарзуллаев, шунингдек, Абдуллоҳ Содиқ бошчилигидаги адвокатлар иштирокида кўриб чиқилмоқда.

Учинчи суд мажлисида адвокат томонидан терговда гувоҳ сифатида сўроқ қилинган Ғайратхўжа Сайдалиевни ҳам сўроқ қилиш бўйича илтимоснома киритилди. Гувоҳнинг олдинги суд мажлисларида қатнашгани туфайли унинг кўрсатма беришига рухсат берилмади. Адвокат, шунингдек, олдинги экспертдан кўнгли тўлмагани сабабли қўшимча эксперт сифатида Дин ишлари бўйича қўмитанинг собиқ раиси Нуриймон Абулҳасанни ҳам сўроқ қилишни сўради. Унинг бу сўрови ҳам судя томонидан қаноатлантирилмади.

Суд мажлисида Алишер Турсуновнинг ўзи кўрсатма бериб, Туркияда фаолият олиб борган вақтда чиқарилган материаллари учун Диний қўмита рухсатини олиш зарурати бор деб ўйламаганини билдирди. Шунингдек, у ўзига қўйилган бошқа айбловлар бўйича ҳам изоҳ ҳамда қарши фикрларини билдирди.

Мубашшир Аҳмаднинг таъкидлашича, унинг саломатлиги: қон босими ва қанд миқдори меъёрида.

Суд мажлиси охирида судя томонлар музокараси учун танаффус эълон қилди. Кейинги суд мажлиси 18 сентябр куни, 17:30 га қолдирилди.

Алишер Турсуновга нисбатан Жиноят кодексининг учта моддаси бўйича айблов қўйилган:

●     244-3-модда: Диний мазмундаги материалларни қонунга хилоф равишда тайёрлаш, сақлаш, олиб кириш ёки тарқатиш;

●     244-1-модда: Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш;

●     156-модда: Миллий, ирқий, этник ёки диний адоват қўзғатиш.

Иккинчи суд мажлисида Алишер Турсунов томонидан ижтимоий тармоқларида эълон қилинган материалларига тергов органининг сўровига кўра хулоса берган экспертлар қатнашганди. Хусусан, "Ренессанс" университетининг сиёсатшунослик фанлари бўйича профессори Одил Мусаев материаллар бўйича сиёсий хулосалар берган. Дин ишлари бўйича қўмита Диншунослик экспертизаси бўлими мутахассиси Шаҳбоз Низомов эса материалларни диний нуқтайи назардан баҳолаган.

Биринчи суд мажлисида судя – прокурорнинг илтимосига асосан мажлисни аудио ва фото-видеоларни ёзиб олишни тақиқлаган. Лекин суд жараёни очиқ ўтади – унда ОАВ ва жамоатчилик вакиллари иштирок этиши мумкин.