Тошкент халқаро аэропортида хориждан олиб кирилаётган мобил қурилмаларни божхона расмийлаштирувидан ўтказиш стандарт тартибда қайта йўлга қўйилди. Бу ҳақда Божхона қўмитаси матбуот котиби Ҳусан Тангриевга асосланиб, Kun.uz мухбири хабар бермоқда.
Унинг сўзларига кўра, 11 ноябр куни куннинг биринчи ярмида UZIMEI ҳамда Божхона қўмитаси вакиллари Тошкент халқаро аэропортида учрашиб, музокаралар олиб борган.
Музокаралар якунида мобил қурилмаларнинг IMEI идентификаторларини чуқур аниқлаш зарурати туғилган ҳолларда божхона ходимларига амалий кўмак бериш учун UZIMEI вакилларининг аэропортда доимий фаолият юритиши йўлга қўйилган.
Шу сабабли вақтинчалик тўхтатиш ва текшириш чоралари бекор қилиниб, мобил қурилмаларни бемалол олиб кириш ва расмийлаштириш қайта тикланди. Шунингдек, шу пайтгача божхона назоратида ушлаб турилган юзлаб мобил қурилмаларни ўз эгаларига қайтариш ишлари бошланган.
Божхонадаги экспертиза
10 ноябр куни ижтимоий тармоқларда Тошкент халқаро аэропортида хориждан учиб келаётган йўловчиларнинг қиймати 1 000 доллардан юқори бўлган мобил телефонлари экспертиза ўтказиш учун 30 кунгача муддатга вақтинча сақлашга олинаётгани ҳақида хабарлар тарқалганди. Шунингдек, қурилмаларни экспертизасиз, бир кун ичида расмийлаштириш учун қўшимча тўлов жорий этилгани маълум бўлди.
Бундай эспертизага сабаб сифатида телефон импортида IMEI кодларини сохталаштириш ҳолатлари кўпайгани келтирилганди.
Бу хабар фонида Тошкентдаги «Малика» маиший техника бозорида айрим iPhone моделлари нархи 50 доллардан 400 долларгача ошди.
Ижтимоий тармоқ фаолларида янги тартибнинг ҳуқуқий асослари ва қўлланиш механизми борасида саволлар туғилди.
Кун охирида Божхона қўмитаси аэропортда мобил қурилмаларнинг IMEI идентификаторлари ҳақиқий эканини тасдиқлаш масалаларига ойдинлик киритилгунга қадар божхона расмийлаштирувлари вақтинча тўхтатилганини маълум қилганди.
